Base establesé pa mas kas pagabel na Hulanda Karibense
Den e último aña a tuma pasonan grandi den realisashon di mas kas pagabel i pa hasi biba na Boneiru, Sint Eustatius i Saba mas barata. Esaki ta sali na kla for di e promé Rapòrt di Progreso di e Agènda di Maneho di Bibienda Públiko i Órden Espasial pa Hulanda Karibense, ku Sekretario di Estado Alexandra van Huffelen ta manda awe pa Tweede Kamer. E rapòrt di progreso 2023 ta mustra e desaroyonan pa kada isla for di inisio di e implementashon di e agènda di maneho na komienso den 2023.
Mehorá e nivel di bida i kombatí pobresa na Boneiru, Sint Eustatius i Saba ta metanan importante pa Gobièrnu Sentral i e Entidatnan Públiko di Boneiru, Sint Eustatius i Saba. Un kas pagabel ta un parti importante di un bon bida. Pa e motibu akí e partidonan akí ta komprometé nan mes huntu pa konstruí mas kas pagabel i pa baha e gastunan di bibienda pa persona ku tin entrada di mas abou. Un programa nobo di desaroyo espasial lo protehá mihó tur loke ta bunita i úniko riba tera i laman.
Boneiru: Un dil di bibienda ta ofresé 2.125 kas pagabel
Na Boneiru a firma un dil di bibienda nobo. Esaki ta bon pa un total di 2,125 kas nobo pagabel te ku 2030, di kua tin 445 den konstrukshon kaba. Ademas, a implementá alivio di gastu di hür pa e sektor di hür sosial (un promedio di $265 pa luna pa kas di famia) i komo piloto pa e sektor di hür privá (un promedio di $445 pa luna pa kada kas di famia). Tambe a ahustá e límite di liberalisashon: di $750 pa $937. Di e forma akí mas hürdó por hasi un apelashon na e Komishon di hür den e sektor sosial i privá. Gobièrnu Sentral ta pone €990.000 disponibel pa instalá entre otro pènel solar ku karga di bateria na 118 kas di hür sosial nobo di FCB.
Sint Eustatius: Redukshon di gastu di hür pa 100 kas di famia
Na Sint Eustatius un Akuerdo di Intenshon Social Housing (pa traha kas sosial) ta duna guia na konstrukshon di 50 kas di hür sosial i renobashon di 100 kas di hür sosial. Ademas, a otorgá $399.000 na supsidio di doño di kas pa redusí e aporte personal den e sektor di hür sosial. Ta trata di alrededor 100 kas di famia den bibienda di hür sosial ku ta bai paga un promedio di $333 ménos pa luna. Tambe ta investigá kon hende ku un entrada modesto ku ta obligá na hür kas privá por haña derecho riba un supsidio di doño di kas.
Pa kombatí pobresa di energia, Gobièrnu Sentral ta pone €450.000 euro disponibel pa redusí gastunan di energia. Ku esaki lo proveé kada kas di hür sosial ku 4 pènel solar, di manera ku e energia ku ta kolektá durante oranan di dia lo redusí direktamente e kuenta di energia di e hürdó.
Saba: konstrukshon aselerá i aparato ku ta spar energia
Na Saba e firmamentu di un Akuerdo di Intenshon ta pèrkurá pa, entre otro, e desaroyo di 50 kas di hür i kas di kompra pagabel. Ademas, a pone €1.2 mion disponibel pa konstrukshon aselerá di 18 kas di hür sosial dor di e korporashon di kas Bazalt Wonen den e proyekto Under the Hill-2. E kasnan akí lo ta kla den e promé kuartal di 2024.
Saba tin un tradishon fuerte di konstruí bo propio kas. Pero e gastunan pa trabou di preparashon ta hopi haltu i normalmente un hipotek no ta kubri esaki. Pa e motibu akí ta bini un areglo insular kaminda por risibí un kontribushon pa finansiá e trabounan di preparashon ku ta nesesario pa konstrukshon di un propio kas. Pensa riba trabou di ekskavashon i konstrukshon di un renbak, tanki séptiko i fundeshi.
E redukshon realisá di gastu di hür den sektor di hür sosial ta suma na Saba un promedio di $158 pa luna pa kas di famia. Pa kombatí pobresa di energia, a pone €360.000 disponibel pa redusí gastu di bibienda. Di e manera aki ta entregá aparatonan doméstiko efisiente ku energia manera frizer, frishidèr i stof na persona ku ménos entrada.
A pone e base
E Rapòrt di Progreso 2023 ta mustra ku hopi kos a sosodé den e promé aña di implementashon di e Agènda di Maneho di Bibienda Públiko i Órden Espasial pa Hulanda Karibense. E base ta kla: e ruta di kontenido ta establesé, e rekursonan finansiero ta disponibel i por organisá e kapasidat di implementashon. Tambe tur hende por manda un reakshon riba e programa di desaroyo espasial di Hulanda Karibense te ku 15 di febrüari.
Na tur tres isla a pone un montante di $408,000 disponibel den fondo pa flexpool pa fortalesé e kapasidat di e aparato públiko riba e área di bibienda públiko i órden espasial. Na aña 2024, e gabinete demishonario i e Kolegionan Ehekutivo di Boneiru, Sint Eustatius i Saba ta sigui traha huntu riba bibienda pagabel i konfortabel pa mas i mas hende.
Wak tambe
Karta na Tweede Kamer