Inflashon ta subi na Boneiru i ta baha na Sint Eustatius i Saba
Den e di kuater kuartal di 2023 produkto i servisio di konsumidó tabata 4,2 porshento mas karu na Boneiru ku e aña anterior. Den e di tres kuartal inflashon tabata 1,9 porshento. Esaki CBS ta informá a base di e índise di preis di konsumidó Hulanda Karibense.
Na Sint Eustatius, riba base anual, e preisnan a baha ku 1,0 porshento den e di kuater kuartal di 2023. Den e di tres kuartal e preisnan a keda stabil. Na Saba inflashon tabata 1,9 porshento den e di kuater kuartal. Un kuartal anterior esaki tabata 2,8 porshento.
Preisnan a subi na Boneiru ku 0,3 porshento kompará ku kuartal anterior
Kompará ku e di tres kuartal di 2023 preisnan na Boneiru a subi ku 0,3 porshento den e di kuater kuartal. Gastunan di transporte a yuda okashoná e subida akí; preis di gasolin a subi ku 0,4 porshento den e di kuater kuartal, kompará ku e kuartal anterior, preis di disel ku 2,3 porshento. Ademas preis di paña i sapatu a subi ku 1,6 porshento. Preis di artíkulonan pa higiene a subi ku 2,8 porshento kompará ku e kuartal anterior.
Preisnan na Sint Eustatius 0,1 porshento mas abou ku kuartal anterior
Preis di konsumidó na Sint Eustatius a baha den e di kuater kuartal di 2023 ku 0,1 porshento kompará ku e kuartal anterior. Preis di paña, aparato doméstiko i muebel a baha den e di kuater kuartal kompará ku e di tres kuartal.
En kambio desaroyo di preis di kombustibel tabatin un efekto asendente riba desaroyo di preis di konsumidó. Por ehèmpel preis di gasolin a subi ku 5,4 porshento kompará ku e kuartal anterior.
Preisnan a keda igual na Saba kompará ku kuartal anterior
Preis di konsumidó na Saba den e di kuater kuartal di 2023 a keda (promedio) igual na esun den e kuartal anterior. Apesar di esei por nota subida di preis den gastunan di transporte. Preis di gasolin a subi den e di kuater kuartal ku 9,9 porshento kompará ku e kuartal anterior. Ademas preis di pasashi a subi ku 10,4 porshento, i otro servisionan di transporte ta mustra un oumento di 14,0 porshento kompará ku e di tres kuartal den 2023.
Komo ku preis di produktonan pa mantenshon di bibienda a baha ku 2,6 porshento kompará ku e kuartal anterior, esaki a frena e subida e kuartal akí. Tambe preis di paña i sapatu a baha ku 2,3 porshento.
Desaroyo preis promedio 2023
Den 2023 e nivel di preis promedio na Boneiru tabata 3,8 porshento mas haltu ku den 2022. Na Sint Eustatius e preisnan tabata 2,5 porshento mas haltu ku den 2022 i na Saba 4,2 porshento mas haltu. Riba tur e islanan esaki tin di aber ku preisnan mas haltu pa bibienda, awa i elektrisidat, transporte i kuminda. Na Boneiru produkto i servisio riba tereno di salubridat a bira mas karu. Na Sint Eustatius i Saba preis di enseñansa a subi.
Sifranan tentativo
A adaptá e sifranan tentativo tokante e di tres kuartal di 2023 pa Sint Eustatius debí na informashon ku a drenta mas lat. E sifranan tokante e di kuater kuartal di 2023 i huntu ku nan e sifranan anual di 2023 tambe ta tentativo i lo keda stipulá definitivamente ora publiká tokante e promé kuartal di 2024.
Fuentenan:
tatLine - Caribisch Nederland
https://opendata.cbs.nl/CBS/nl/dataset/84046NED/table?dl=BFA9