Papiamentu na Boneiru awor ofisialmente rekonosí bou di e Pakto Oropeo pa idioma regional i idioma di minoria
Gabinete ofisialmente A rekonosé papiamentu ofisialmente na Boneiru bou di e Pakto Oropeo pa idioma regional òf idioma di minoria. Pa esaki a entrega ‘input’ i ekspertisio for di Entidat Públiko Boneiru. Ku esaki, gobièrnu di Reino ke sigui protehá i promové posishon di e idioma pa generashonnan aktual i futuro.
Papiamentu ta un parti importante di e identidat di habitantenan di Boneiru. Preshon kresiendo di otro idioma riba e isla manera hulandes, spañó i ingles por hiba na opreshon indeseabel di papiamentu. Dor di firma ‘E akuerdo intergubernamental pa idioma papiamentu na Boneiru’ na mart 2021, e minister di Asuntunan Interior i Relashonnan den Reino, e minister di Ensenansa, Kultura i Siensia, e Minister di Enseñansa Básiko i Sekundario i Media i Sekretario di Estado di Asuntunan Interior i Relashonnan den Reino a deklará e intenshon pa rekonosé papiamentu bou di e Pakto Oropeo pa idioma regional òf idioma di minoria (despues di esaki: Pakto).
E Pakto ta un tratado di Konseho di Oropa pa protekshon i promoshon di idioma di minoria ku tradishonalmente ta presente den teritorio di un estado. Anteriormente, e Pakto solamente tabata aplikabel pa Hulanda Oropeo. P’esei, pa rekonosé papiamentu pa Boneiru bou di e Pakto, mester a ekstendé e área di alkanse pa Hulanda Karibense promé. Staten-Generaal na desèmber di e aña ku a kaba a akordá esaki parlamentario. Riba djaluna 22 di yanüari e ekspanshon pa Hulanda Karibense a drenta na vigor, simultáneamente ku rekonosementu di Papiamentu na Boneiru bou di e Pakto.
Por rekonosé un idioma bou di dos parti di e Pakto. Un rekonosementu bou di parti II ta un rekonosementu general di un idioma. Ku esaki, un estado ta komprometé su mes pa no inkluí opstákulo pa uso di e idioma den legislashon òf regulashon. Un rekonosementu parti III ta garantisá e protekshon i promoshon di un idioma mas aleu riba tereno spesífiko manera enseñansa, kultura, medionan, tráfiko atministrativo, hurisdikshon, bida sosial-ekonómiko i kolaborashon internashonal. Papiamentu na Boneiru ta rekonosé bou di parti III.