NWO Finansiamentu investigashon sientífiko den parti Karibense di Reino awor struktural
For di aña pasá, e Nederlandse Organisatie voor Wetenschappelijk Onderzoek (NWO, Organisashon Hulandes pa Investigashon Sientífiko) kada aña strukturalmente ta risibí un suma di € 2.500.000,- di e Ministerio di Enseñansa, Kultura i Siensia (OCW) pa investigashon sientífiko den e parti Karibense di Reino.
Saba, Sint Eustatius, Sint Maarten, Aruba, Boneiru i Kòrsou 10 aña kaba ta risibí sosten di NWO via diferente programa di finansiamentu di e programa Caribisch Onderzoek (Investigashon Karibense), loke ta kontribuí na un base sólido pa investigashon sientífiko den e region aki, pero awor esei a bira struktural.
Investigashon sientífiko duradero for di den region
Intenshon di e presupuesto ta pa oumentá konosementu sientífiko i hasi uso di esaki pa desaroyo duradero riba e seis islanan den e parti Karibense di Reino. Lo usa e medionan pa finansiamentu di investigashon sientífiko i pa sostené sientífikonan Hulandes Karibense.
Agènda di konosementu ku temanan di investigashon
E programa Caribisch Onderzoek (Investigashon Karibense) ta desaroyá un agènda di konosementu ku lo usa komo pouta di kontenido pa futuro programanan di finansiamentu temátiko. A base di enkuestanan ekstenso tokante problemátikanan sosial bou di habitantenan i investigadónan di e seis islanan/paisnan, a formulá un agènda di konosementu ku temanan di investigashon. Lo presentá konsepto di e agènda di konosementu na yüni 2024 durante ronda di konsulta riba e islanan, pa kontrolá si ta rekonosé e kontenido. Despues, na òktober 2024 lo anunsiá e agènda di konosementu definitivo durante e Dutch Caribbean Research Week (Siman di Investigashon Hulandes Karibense).
Fundamentu Caribbean Research Platform (CaRP)
Ademas, pronto lo funda e Caribbean Research Platform (CaRP, Plataforma Karibense pa Investigashon), ku establesimentu riba tur seis isla/ pais. NWO lo lanta e plataforma aki pa hunga un papel di sosten pa tur hende ku ta envolví ku investigashon sientífiko, inkluso instituto di konosementu, investigadó independiente, organisashon sosial, gobièrnu lokal i otro partido relevante, pa asina sigui promové kapasidat sientífiko i investigashon. CaRP ta kuminsá reklutá empleado na 2024. E ta bai duna sosten ku formulashon di proposishon pa investigashon, búskeda di fuente di finansiamentu i stimulashon di interkambio di konosementu entre investigadó, sosiedat, empresa, instituto pa enseñansa, i gobièrnu.
Ku e finansiamentu struktural aki i fundamentu di un plataforma di ret regional, den kolaborashon estrecho ku investigadó-, organisashon- i gobièrnunan karibense, NWO ta duna un kontribushon na kresementu duradero di investigashon sientífiko den e region.