CBP BES ta enfoká riba deklarashon di privasidat den Siman di Privasidat 2024
Durante e Siman di Privasidat ku a kuminsá dia 28 di yanüari, Komishon Supervishon di Protekshon di Dato Personal BES ta enfatisá e ròl krusial di deklarashonnan di privasidat. Den un deklarashon di privasidat, organisashonnan ta splika dikon i nan ta kolektá sierto dato personal, kon nan ta usa esaki i kiko ta e derecho di e siudadano na momentu ku ta prosesá su dato personal.
Durante e último añanan, e énfasis di e Komishon primeramente tabata riba engrandesé konsientisashon di e normanan den Lei di Protekshon di Dato Personal BES. Ya pa un tempu kaba e komishon ta dirigí su mes riba supervishon di kumplimentu di e Lei di Protekshon di Dato Personal (Wbp BES), e Lei di Base di Registrashon di Dato Personal BES (Wba BES), i e Lei di Dato di Polis (Wpg).
Pa 2024, e komishon ta enfoká mas riba prosesamentu general di datonan personal. Dunando atenshon spesial na e prosesamentu di e sédula i e implementashon di deklarashonnan di privasidat den organisashonnan. Fuera di su tarea di supervishon manera ta stipulá den e Lei di Protekshon di Dato Personal BES, e komishon ta kontrolá ku e proseso di trata dato personal na e departamento di asuntunan sivil di e tres entidatnan públiko ta tuma lugá di manera kuidadoso, adekuá i sufisientemente protehá ku e eksigensia ku kalidat i integridat di e atministrashonnan básiko mester ta na òrdu.
“Komishon Supervishon di Protekshon di Dato Personal BES ta spera un aña di supervishon i aplikashon efektivo pa avansá protekshon di dato personal na Boneiru, Sint Eustatius i Saba," asina sekretaria sra. mr. Roëlla Pourier ta komentá. Pa mas informashon tokante e legislashon i e tarea di CBP BES, bo por bishitá: www.cbpbes.com.