Maritsa Silberie hefe nobo di sekshon OCW na Rijksdienst Caribisch Nederland

Minister di Enseñansa, Kultura i Siensia (OCW) desde 10 di òktober 2010, ta responsabel pa maneho di enseñansa, kultura i siensia riba e tres islanan di Hulanda Karibense. Sekshon OCW-CG na Rijksdienst Caribisch Nederland ta traha diariamente riba diseño i ehekushon di e maneho riba tereno di enseñansa, kultura, siensia i emansipashon na Boneiru, Sint Eustatius i Saba. Nan ta hasi esaki huntu ku e ministerio na Den Haag. Banda di maneho di enseñansa, pa kua a stipulá e di terser agènda di enseñansa pa Hulanda Karibense, a intensivá maneho di kultura. Tambe ta bai protehá e kultura i naturalesa úniko di Boneiru, Sint Eustatius i Saba, tantu riba komo bou di awa, mihó. OCW-CG ta yuda realisá e metanan ei na Hulanda Karibense.

Maritsa Silberie (56) a nase na Boneiru. El a kuminsá su karera komo dosente di hulandes na Stichting Schoolgemeenschap Bonaire. Di yüni 2004 te aprel 2006 e tabata minister di Enseñansa na Kòrsou tempu di pais Antia Hulandes. Di yüli 2007 te ku yüni 2009 e tabata diputado di Enseñansa. Te ku resien e tabata traha komo kolaboradó di maneho Senior i for di novèmber 2023 komo hefe interino di sekshon di OCW. Hefe di sekshon OCW ta un paso bunita i lógiko.

Maritsa:

“Mi ta sinti mi honrá di por okupá e funshon akí i di por ofresé konosementu, abilidat i ekspertisio nesesario. Mi enfoke ta pa sigui traha ku tur kolega i stakeholder na ámbos banda di oséano ku entusiasmo riba futuro di Hulanda Karibense. Nos yunan ta e futuro. Ta hopi importante pa invertí den nan bienestar i den loke nan tin mester pa por desaroyá nan mes plenamente.”

Direktor di Maneho Internashonal di OCW, Gerbert Kunst:

“Maritsa ta bin ku un kantidat enorme na konosementu i eksperensia komo hefe nobo di sekshon OCW. Pa e motibu ei pues e ta hende muhé adekuado riba e lugá adekuado pa, huntu ku su tim i den bon kolaborashon ku koleganan di OCW na Den Haag, sigui traha riba un Hulanda Karibense ku ta kla pa enfrentá futuro."

Direktor di Rijksdienst Caribisch Nederland, Tim Muller:

“Mi konosé Maritsa komo un persona ku tin enseñansa i kultura na pechu den e área karibense. Riba e terenonan akí el a demonstrá hopi kaba. E ta un teamplayer di bèrdat. Su estilo, konosementu, eksperensia i ret amplio ta kuadra ku e ambishonnan ku tin. Mi ta felisit’é di kurason ku e bunita paso akí.”