Palabrashon nobo tokante bon enseñansa na Sint Eustatius
Pa por adaptá su lès mihó na nesesidat individual di studiante i por ehèmpel anda bon ku diferensia i multilingualismo den klas, dosente na Sint Eustatius lo risibí sosten di coachnan speshal. Ademas, alumno ku tin nesesidat pa sosten adishonal pa por tin un prestashon optimal na skol lo risibí esaki e añanan benidero. Esaki ta algun di e palabrashonnan ku minister Paul (Enseñansa Primario i Sekundario) a hasi ku e direktivanan di skol, Entidat Públiko i organisashon di enseñansa ECE di Sint Eustatius den e di tres Agènda di Enseñansa (Onderwijsagenda). E palabrashonnan mester kontribuí na mehorashon mas ekstenso di enseñansa primario i sekundario riba e isla. Durante su bishita na Hulanda Karibense e minister a firma e agènda.
Palabrashonnan na midí
Minister Paul:
”E profeshonalnan den i rondó di e skolnan na Sint Eustatius ta traha duru tur dia pa bon enseñansa pa e alumnonan. Ku e palabrashonnan importante aki nos por hisa enseñansa na un nivel mas haltu. Nos ta hasi esaki ku bista riba reto- i nesesidatnan spesífiko riba e isla. Di e manera aki e muchanan di Sint Eustatius ta haña e oportunidat pa desaroyá su mes optimalmente”
Diputado Reuben Merkman:
“Ku e agènda aki nos ta invertí huntu den futuro i soño di nos muchanan i ku esaki e futuro di Sint Eustatius. Bon enseñansa ta e yabi pa éksito.”
Direktor di skol Ingrid Whitfield:
“Pa motibu ku mayoria mucha na Sint Eustatius no ta papia hulandes na kas, ta importante pa nan siña esaki bon na skol, komo idioma sekundario. Asina nan por domin’é mesun bon ku Ingles. Ku esaki nan por bai studia na Hulanda Oropeo i amplia nan mundu. E di tres Agènda di Enseñansa ta yuda hasi esaki posibel.”
Mas aleu den e agènda
Lider di skol i direktor di skol tambe ta risibí sosten di e coachnan den su trabou. Di e forma aki tur ku ta kontribuí den e skol por kontribuí na reforsá e kalidat di enseñansa i mantené konosementu i eksperensia nobo den e skolnan. Kada skol ta skohe kua coach ta pas mihó ku su retonan spesífiko. E coachnan ta prosedente di tantu Hulanda Karibense komo Hulanda Oropeo.
Den e agènda tambe a palabrá pa eksplorá e nesesidatnan konkreto di e alumnonan na Sint Eustatius pa sigui su estudio na Hulanda Oropeo sin problema. Lo evaluá e fasilidatnan spesialisá pa alumnonan ku ademas di enseñansa mester di sosten i kuido, pa asina ta mas kla kua aktividat den realidat ta fruktífero i desaroyá esaki mas aleu.
Boneiru i Saba
A firma e Agènda di Enseñansa pa Boneiru i Saba den verano di 2023. Pa e islanan aki tambe tin coach disponibel. Banda di esaki e ministerio di Enseñansa, Kultura i Siensia (OCW) lo inventarisá huntu ku e direktivanan di skol ki treinen adishonal ta nesesario den práktika pa e dosentenan.
Bishita na Hulanda Karibense
Minister Paul ta di bishita na Hulanda Karibense te ku 2 di febrüari i ademas di Sint Eustatius lo bishitá Saba i Boneiru. Ei e lo bishitá diferente skol, organisashon di enseñansa i un sentro pa hóben. Na Saba e lo firma e kombenio di alohamentu di skol den kua ministerio di OCW i Entidat Públiko ta bai di akuerdo pa kolaborá riba edifisio pa skol adekuá, un rekisito pa bon enseñansa.