Apertura di konsulta kódigo postal pa Hulanda Karibense
Aktualmente no tin sistema di kódigo postal na Boneiru, Saba, i Sint Eustatius. Dor di esaki, hopi biaha pòst pa habitante, empresario i organisashon (gubernamental) ta yega lat, òf no ta yega mes. Tambe ta asina ku sin kódigo postal no ta posibel pa hasi uso di servisionan online (e-commerce). Pa mehorá e servisio (online) di gobièrnu na Hulanda Karibense, awor tin un proposishon riba mesa pa stipulá kódigo postal den e serie di 0000AA-0999ZZ. E konsulta via internet ta habrí pa tur hende, i ta posibel pa yuda pensa i pa reakshoná te ku 26 di ougùstùs.
![Postcodes Caribisch Nederland](/binaries/medium/content/gallery/rijksdienstcn-nederlands/content-afbeeldingen/nieuws-afbeeldingen/2024/algemeen/cn_postcodes.jpg)
Un sistema di kódigo postal nobo
E proposishon pa stipulá kódigo postal pa Hulanda Karibense den e serie di 0000AA-0999ZZ ta basá riba e informe di konseho di e Ministerio di Asuntunan Interno i Relashon den Reino (BZK). Na aña 2024 a hasi un investigashon tokante kon kódigo postal por aportá na mihó entrega di pòst.
E proposishon ta tene kuenta ku e siguiente puntonan:
- Mester por usa e sistema di kódigo postal den henter Hulanda Karibense.
- E sistema di kódigo postal mester pas ku e sistema na Hulanda Oropeo.
- Mester por identifiká e isla a base di e kódigo postal. E variante mínimo ta 1 kódigo postal pa kada isla.
- E sistema di kódigo postal mester ta fleksibel i prepará pa krese.
A realisá e konseho i e proposishon den konsulta ku e Entidatnan Públiko Boneiru, Saba, i Sint Eustatius, organisashonnan di implementashon, empresanan, FXDC, PostNL, i Ministerio di Asuntunan Ekonómiko i Klima (EZK).
Duna bo reakshon
Abo ke trese un idea dilanti/òf bo ke yuda pensa? Reakshoná e ora ei via e konsulta via internet Serie Kódigo postal pa Hulanda Karibense riba Overheid.nl. Bo por reakshoná na hulandes, ingles, òf papiamentu.