Caribbean Health Academy a entrená 1500 profeshonal di kuido den kuido agudo
Den e último 3 añanan, ku kolaborashon di Amsterdam UMC Academy, 1500 profeshonal di kuido den Karibe a risibí entrenamentu adishonal den kuido agudo. A realisá e proyekto úniko akí pa medio di kolaborashon entre Dutch Caribbean Hospital Alliance (DCHA), Amsterdam UMC Academie, i ministerio di Salubridat, Bienestar i Deporte (VWS). Ademas e entrenadó di hòspital a formulá plan pa duna e kolaborashon i entrenamentu un karakter duradero.
![Opleiders van de ziekenhuizen uit de Caribische regio](/binaries/medium/content/gallery/rijksdienstcn-nederlands/content-afbeeldingen/nieuws-afbeeldingen/2024/algemeen/zorgprofessionals_caribbean_health_academy.jpg)
Den e proyekto di CARIBHA, for di 2021 a duna entrenamentu adishonal den kuido agudo na kasi 1500 profeshonal di kuido, tantu dunadó di kuido komo enfermero(a). Mediante e programa di entrenamentu, e islanan por reakshoná adekuadamente riba situashon di kuido agudo, manera durante un pandemia. E programa tabata konserní un pakete amplio di formashon, orientá spesífikamente riba kuido di Covid, Entrenamentu Básiko di Kuido Agudo (BAZ), rasonamentu klíniko i entrenamentu avansá pa enfermero(a) di Ayudo di Emergensia (SEH), Kuido Intensivo (IC), enfermero(a) di sekshon di Kuido Kardiako (CCU), enfermero(a) di diabétis i kolaboradó di anestesia.
A inisiá ku e proyekto di CARIBHA riba petishon di ministerio di VWS durante e pandemia di Covid i finansiá ku un supsidio di mas di 2 mion euro. Pa medio di kolaborashon estrecho entre e hòspitalnan di Aruba, Boneiru, Kòrsou, Sint Eustatius, Sint Maarten i Saba i Amsterdam UMC Academie, a duna un impulso enorme na kalidat di kuido den e region karibense i na desaroyo profeshonal i disponibilidat di dunadó di kuido.