Eksitoso promé konferensia ‘futuro di kuido na Hulanda Karibense’
Riba djárason 19 i djaweps 20 di yüni 2024 Kuido i Hubentut Hulanda Karibense (ZJCN) a organisá e promé konferensia 'Futuro di kuido na Hulanda Karibense’. E konferensia, ku a sigui tantu en bibu na Boneiru komo online, a trese partner- di kadena i interesadonan huntu pa diskutí e reto- i oportunidatnan úniko di kuido di salú na Hulanda Karibense. Diferente eksperto a kompartí nan konosementu riba temanan manera kuido ekivalente, futuro di e sistema di kuido i digitalisashon. Tambe a organisá workshop- i ekskurshonnan na institushonnan di kuido pa diskutí i mehorá kalidat i aksesibilidat di kuido.
E konferensia a tuma lugá relashoná ku e rapòrt final ‘The Caribbean Netherlands - Health system review’, ku ‘European Observatory on Health Systems and Policies’ a traha. E rapòrt ta duna un bista detayá di e aktual estado di kuido di salú na Hulanda Karibense, resultadonan ku a logra desde 2010, i mehorashonnan nesesario pa elevá kuido na nivel di Hulanda Oropeo Por haña e rapòrt aki.
Pa medio di organisashon di e konferensia di kuido ZJCN ta trese partner- di kadena i interesadonan huntu pa diskutí oportunidat i reto den kuido. Hulanda Karibense ta enfrentá retonan di kuido di salú úniko. E karakter insular ta trese aparte di retrasonan real den kuido, nesesidatnan spesífiko kuné. Ademas e problemátika di salubridat, abilidatnan di salubridat, persepshon i espektativa di kuido di salú, ta diferensiá di esnan na Hulanda Oropeo.
Presentenan
Durante e konferensia diferente eksperto a bin huntu pa kompartí nan konosementu riba temanan manera kuido ekivalente, futuro di e sistema di kuido i digitalisashon. Konhuntamente a diskutí kon por garantisá kalidat i aksesibilidat di kuido na un manera duradero. Oradornan tabata entre otro Tie Tjee, Konsehero Senior di Liderazgo di Ret Stratégiko i Jamiu Busari, dòkter di mucha na Hospital Horacio Oduber, katedrátiko na Ontario Tech University na Canada i profesor asosiá na Maastricht University na Hulanda. Tambe diputadonan Nina den Heyer (Boneiru), Reuben Merkman (Sint Eustatius) i Eviton Heyliger (Saba) tabata presente i a kompartí nan eksperensia i konosementu balioso.
Workshop
Aparte di e oradornan inspirante a tene diferente workshop, entre nan 'Futuro di Kuido', 'Digitalisashon' i 'Sistemanan di Salubridat den Transishon (HiT)'. Durante di e workshopnan di HiT Ewout van Ginneken i Nathan Shuftan a duna splikashon amplio di e resultadonan di e rapòrt final. Ademas a organisá ekskurshonnan pa diferente institushon di kuido na Boneiru, manera hospital Fundashon Mariadal.
Kolaborashon i ekivalensia temanan importante
Un konklushon importante ta ku kolaborashon mutuo entre e islanan i ku partnernan di kadena ta un elemento esensial pa konhuntamente keda sigui mehorá kuido. Ekivalensia tambe tabata un tema ku a keda bin bèk. Por ehèmpel a diskutí entre otro si kuido na Hulanda Karibense mester ta ekivalente na esun di Hulanda Oropeo. Un partisipante a bisa lo siguiente al respekto: “Nos no mester keda fiha siegamente riba ekivalensia ku Hulanda Oropeo, pero lucha pa e mihó kuido posibel pa nos islanan.”
Ku un bunita asistensia kaminda partnernan di kadena di tantu Hulanda Karibense, Kòrsou, Aruba i Sint Maarten tabata ampliamente representá, nos ta wak konhuntamente bèk riba un promé edishon eksitoso.