Kambio importante den regulashon di estadia entrante 1 di yüli 2024
For di promé di yüli 2024, lo tin regulashon nobo pa estadia i trabou na Hulanda Karibense. E kambionan aki ta nesesario pa motibu di e subida di salario mínimo i pa sòru pa e eksigensia di entrada ta den liña ku e nivel di bida aktualmente i kosto di mantenshon di bida. For di 10 di òktober 2010, no ta indeksá e norma di montante, debí na esaki un ahuste ta nesesario awor.
E kambionan prinsipal ta:
- Pa meta di estadia relashoná ku trabou, e entrada bruto mester ta mínimo igual ku e salario mínimo nobo. For di 1 di yüli, e montante lo ta $1.750,67.
- Pa reunion di famia, yunan adoptivo- i di kriansa, i penshonadonan, e entrada rekerí ta oumentá pa 120% di e salario mínimo, òf $2.100,80 pa luna den 2024. Pa aplikashonnan pa mucha ku no ta nasé na Hulanda Karibense, ta apliká un eksigensia di 140% di e salario mínimo òf $2.450,94 pa luna den 2024. Ehèmpel: Si un hende ta para garantia pa e promé persona, e mester tin un entrada di 120% di e salario mínimo. Si un hende ta para garantia pa dos òf mas persona (manera muchanan), e mester kumpli ku un entrada di 140% di e salario mínimo.
- Pa studiante, e entrada mester ta mínimo igual ku 50% di e salario mínimo, ku den 2024 ta $875,34 pa luna.
Petishonnan ku entregá promé ku 1 di yüli 2024 lo kai bou di e normanan bieu. Si bo ta entregá tres petishon konsekutivo pa ekstenshon despues di 1 di yüli 2024, lo apliká e norma bieu. Pa tur otro petishonnan di ekstenshon ku bo entregá despues di 1 di yüli 2024, lo apliká e normanan nobo. A publiká e kambionan aki den Staatscourant dia 7 di yüni 2024.
Importante pa sa
Pa hasi e tempu di prosesá mas kòrtiku, IND ta aseptá solamente aplikashon kompletu. Aplikashon inkompletu ta kousa retraso i por resultá den un periodo di espera di 5 pa 6 luna. Si entregá tur dokumento nesesario kompletu, por otorgá un pèrmit dentro di 2 siman. Tambe, duna bo ingreso na Belastingdienst Caribisch Nederland (BCN) pa medio di deklarashon di impuesto di entrada pa IND por verifiká e eksigensia di entrada.