Tarifa máksimo di koriente na Hulanda Karibense ta baha levemente entrante promé di yüli
Outoridat konsumidó i merkado, Autoriteit Consument & Markt (ACM), a stipulá tarifa máksimo pa distribushon di koriente na Hulanda Karibense. E tarifanan ta baha levemente entrante promé di yüli 2024, pa motibu ku preis di kombustibel fosil ku ta usa pa produkshon di koriente a baha un tiki. Un kas di famia promedio na Boneiru ta paga pa e motibu akí mas òf ménos 0,60 USD ménos pa luna, pa Sint Eustatius i Saba e resibu di koriente ta bira 2 te 3 USD ménos.
Anualmente den luna di desèmber, ACM ta stipulá tarifa máksimo pa produkshon i distribushon di koriente na Hulanda Karibense pa e aña nobo. Suministradónan di koriente ta stipulá e tarifanan ku nan ta kobra abitante- i kompanianan, a base di e tarifa máksimo akí. Pa por tene kuenta ku e preis di kombustibel variabel, ACM ta ahustá e tarifa máksimo, si ta nesesario, entrante promé di yüli.
Ministerio di Asuntunan Ekonómiko i Klima ta supsidiá e gastunan di maneho di e ret di elektrisidat (e derecho fiho) pa tur konekshon na e nivel hulandes oropeo promedio. Spesífikamente pa konekshonnan chikitu ta sigui supsidiá e derecho fiho mas te na sero den 2024.
Boneiru
Pa Boneiru e tarifa máksimo di uzo variabel ta baha levemente di 0,3575 USD/kWh na 0,3550 USD/kWh. E tarifa máksimo pa pagabon (prépago) tambe ta baha levemente di 0,6371 USD/kWh na 0,6346 USD/kWh, promé ku aplikashon di supsidio riba e derecho fiho. Pa konsumo di un kas di famia promedio na Boneiru esaki ta nifiká un bahada di mas òf ménos 0,60 USD pa luna.
Sint Eustatius
Pa Sint Eustatius e tarifa máksimo di uzo variabel ta baha levemente di 0,3958 USD/kWh na 0,3877 USD/kWh. Pa uzo di parti di un kas di famia promedio na Sint Eustatius esaki ta nifiká un bahada di mas òf ménos 2 USD pa luna.
Saba
Pa Saba e tarifa máksimo di uzo variabel ta baha levemente di 0,3810 USD/kWh na 0,3687 USD/kWh. Pa uzo di parti di un kas di famia promedio na Saba esaki ta nifiká un bahada di mas òf ménos 3 USD pa luna.