Habitantenan di Sint Eustatius ta risibí nan tarheta di kuido entrante 8 di yüli
Riba 8 di yüli Kuido i Hubentut Hulanda Karibense (ZJCN) lo introdusí e tarheta di kuido na Sint Eustatius. Riba 22 di aprel e introdukshon a tuma lugá na Saba i mas lat e aña akí Boneiru tambe lo sigui. E tarheta di kuido ta un tarheta individual pa fasilitá akseso na kuido médiko di emergensia den eksterior pa habitantenan di Hulanda Karibense ku ta sigurá. Ta trata den e kasonan ei di tratamentu médiko urgente ku no no por keda posponé.
![ZJCN Zorgpas](/binaries/medium/content/gallery/rijksdienstcn-nederlands/content-afbeeldingen/nieuws-afbeeldingen/2024/algemeen/zjcnzorgpas.jpg)
Tarheta di kuido komo prueba di seguro
E tarheta di kuido ta remplasá e prueba di seguro. Aseguradonan di awor padilanti no mester bai ofisina di ZJCN mas pa buska un prueba di seguro, promé ku nan biaha. Riba e tarheta di seguro tin banda di datonan di e asegurado, e datonan di kontakto menshoná tambe di ZJCN. Den kaso di kuido médiko di emergensia den eksterior mester tuma kontakto mas pronto posibel ku ZJCN. Ademas por uza e tarheta di kuido na botika i laboratorio na Sint Eustatius.
Tarheta di kuido no ta un seguro di biahe
E tarheta di kuido ta eksklusivamente destiná pa kasonan di emergensia médiko den eksterior ku no por keda posponé. ZJCN ta konsehá tur habitante di Hulanda Karibense pa sera un seguro di biahe promé ku biaha pa eksterior.
Rekohé e tarheta di kuido
Ta supliká habitantenan sigurá di Sint Eustatius pa pasa buska nan tarheta di kuido durante:
Periodo |
Orario |
8 di yüli t/k 2 di ougùstùs – di djaluna pa djabièrnè *Ku eksepshon di djaluna 29 di yüli |
09:00 – 17:00 |
Sitio: Fort Oranjestraat 12 (eks ofisina di RCN/SSO)
Tur habitante di Sint Eustatius ku un periodo di seguro di minimal 2 aña ta risibí un tarheta di kuido personal. Mayornan ku tin yu bou di 18 aña por pasa buska e tarheta di nan yu. Balides di e tarheta di kuido ta varia di 2 te 5 aña, dependiendo di e periodo di e seguro.
Ora di buska e tarheta mester presentá ku un sédula/tarheta di identifikashon, pasport òf reibeweis bálido. Tambe ta rekerí pa mustra un tarheta di banko, di manera ku por registrá e number di kuenta di banko den e registro di dato di ZJCN pa kompensashonnan (médiko) den futuro. E tarheta di kuido ta grátis.
Formulario di apoderashon
Habitantenan di Sint Eustatius ku ta ménos mobil òf tin otro limitashon, por outorisá un miembro di famia pa medio di un formulario di apoderashon, ku ta disponibel tantu ònlain komo optenibel na ofisina di ZJCN.
Boneiru
Despues di entrega di e tarhetanan di kuido na Sint Eustatius, lo anunsiá ki dia habitantenan di Boneiru por pasa buska nan tarheta di kuido. Pa mas informashon por bishitá: http://www.zvkcn.nl/