Inisio aplikashon pa kompensashon pa artíkulo di skol SZW
E aña aki un bes mas mayor òf tutor di alumno na Hulanda Karibense por bini na remarke pa un kompensashon den gastu di artíkulo di skol manera unifòrm, sapatu i artíkulo pa skibi. Pa yu ku (despues di fakansi grandi) ta bai skol sekundario, mayornan òf tutornan na Boneiru i Sint Eustatius por entregá un petishon na unidat SZW di RCN.
Boneiru
Kas di famia na Boneiru ku un òf mas yu na skol sekundario i ku un entrada te $2.100 nèto pa luna, por bini na remarke pa e sosten aki. Ta posibel pa apliká via di e-mail òf personalmente durante orario di konsulta spesial: djasabra 29 di yüni i 6 di yüli di 9’or di mainta te 2’or di mèrdia na e ofisina di SZW na Playa. Durante e luna di yüli kompletu lo tin orario di konsulta riba djaluna, djamars i djárason di 1.30’or di mèrdia pa 4.00’or di atardi.
E orario di konsulta lo tuma lugá na ofisina di SZW na Playa. Si un mayor òf kuidadó no por pasa na e orarionan di konsulta i tampoko por apliká digital, por traha un sita via di meil na onderstand@rijksdienstcn.com òf via WhatsApp +599 795 5053.
Sint Eustatius
Na Sint Eustatius e límite di entrada ta $2.100 nèto pa luna pa kas di famia tambe. Na Sint Eustatius mayor i kuidadó por entregá un aplikashon na e ofisina di SZW di djaluna te ku djaweps durante oranan di mainta.
Dokumentonan rekerí
Por haña e formulario di aplikashon riba www.rijksdienstcn.com bou di ‘Asuntunan Sosial’. Banda di esaki, e petishonarionan mester añadí un (kopia di un) sédula bálido (tambe di e mucha(nan)), slep di salario i estado di kuenta di banko di último dos luna. Mester entregá e dokumentonan aki tambe di pareha di e petishonario si e ta forma parti di e mesun kas di famia. Ademas mester proba ku e yu ta bai skol sekundario dor di entregá prueba di inskripshon òf e último rapòrt di skol básiko.Un vògt òf mayor di kriansa mester entregá tambe un desishon ku ta ilustrá ku e ta e kuidadó legal.
Muchanan na skol básiko i Saba
Mayornan òf tutornan di mucha ku ta bai skol básiko por tuma kontakto ku e Entidatnan Públiko di nan isla pa e kondishonnan i dokumentonan nesesario. Na Saba bo por akudí na Entidat Públiko Saba pa petishon di kompensashon pa artíkulo di skol i unifòrm di skol pa mucha di tantu skol básiko komo skol sekundario.
Por mas informashon tokante e kampaña di Artíkulo pa skol di 2024, wak riba www.rijksdienstcn.com.