Promé enkuentro Komishon di Kuido Hulanda Karibense 2025 na Boneiru
Boneiru – E komishon Kuido Hulanda karibense 2025 a reuní pa promé biaha físikamente riba 31 di mart i 1 di aprel na Boneiru. Bou di guia di presidente Frits Goedgedrag, e komishon a analisá e futuro di kuido na Boneiru, Sint Eustatius i Saba. E komishon lo formulá rekomendashon pa sekretario di estado di Ministerio di Salubridat, Bienestar i Deporte (VWS) pa yega na un infrastruktura di kuido duradero na Hulanda Karibense. Ku representashon di gobièrnu lokal, e sektor di kuido i ekspertonan eksterno, a dal un paso importante den e proseso aki.
E komishon ta konsistí di e gezaghèbernan di Hulanda Karibense – señor John Soliano (Boneiru), señora Alida Francis (Sint Eustatius) i señor Jonathan Johnson (Saba) – komplementá ku representantenan di e sektor di kuido, entre otro señor Giovanni Frans, señor Philip van Woerkom i señora Willemijn van Leeuwen. Tambe direktor di Kuido i Hubentut Hulanda Karibense (ZJCN), señor Herbert Barnard, i dos (2) eksperto eksterno, señora Edilse Goeloe i señor Patrick Jeurissen ta forma parti di e komishon. Señora Kareshma López ta yena e funshon di sekretaria.
E tarea di e komishon ta pa formulá rekomendashon pa desaroyo mas aleu di e infrastruktura di kuido na Hulanda Karibense. Den e kuadro eksistente legal e plan lo duna un bista di kon por fortifiká i mehorá kuido e añanan benidero, ku meta pa alkansá un nivel di kuido ku ta igual na esun di Hulanda Oropeo. E rapòrt “The Caribbean Netherlands: Health System Review” ta sirbi komo guia pa esaki.
Durante e enkuentro a diskutí diferente tema, entre otro akseso na kalidat di kuido, kuido preventivo i promové salú, reto geográfiko, merkado laboral pa profeshonal di kuido i fortifikashon di e posishon di un pashènt. Aki ta tene kuenta tambe ku eksperensia i señal di habitantenan, manera nan a kompartí esaki den kombersashonnan anterior ku gobièrnu lokal.