A revelá obra di arte Fruta di Grasia na JICN
Instituto Hudisial Hulanda Karibense (JICN) a revelá e obra di arte Fruta di Grasia di artista Eugenie Boon na Boneiru. E eskultura spesial aki ta simbolisá kresementu, segundo oportunidat i forsa di komunidat i tin un lugá permanente na entrada di e instituto.
E eskultura ta inspirá riba Dreifi di Laman, konosí tambe komo drùif di laman, un mata ku ta pasa di flor pa fruta bèrdè te ku ora e bira un drùif hechu. E proseso natural di kresementu ta reflehá kon hende ta desaroyá su mes — kada ken na su propio ritmo i manera. Tin biaha un hende mester di sosten, guia i un ambiente sigur. Esaki ta konektá ku e mishon di JICN: yudá hende den su proseso di desaroyo i rekuperashon.
E obra kolorido ta konsistí di kuater figura ku ta bai ariba huntu den un spiral i ta parse di ta influensiá pa bientu di nortost-pasat. Kada figura ta simbolisá un etapa den e proseso di madures di e drùif di laman, i asina tambe individuonan úniko den un sosiedat. E base ta referí na e kuadro di “dòbel chèns” di e wega ‘Mens Erger Je Niet’, ku kua e artista ta enfatisá ku tur hende tin derecho riba oportunidat nobo.
E realisashon di e obra di arte a bira posibel pa medio di Rijksvastgoedbedrijf (RVB), ku ta responsabel pa konstrukshon i mantenshon di edifisio di gobièrnu. Denter di e presupuesto di konstrukshon a reservá espasio finansiero pa arte, loke a hasi posibel pa realisá Fruta di Grasia.
Tantu empleado komo detenido di JICN a kontribuí aktivamente den e proseso pa krea e obra di arte. E kolaborashon aki a duna e eskultura un dimenshon èkstra ku ta di akuerdo ku e esfuerso pa reintegrashon i rekuperashon. Fruta di Grasia no ta solamente un obra di arte, sino tambe un símbolo tangibel di e segundo oportunidatnan ku JICN ta ofresé, i di e poder di traha huntu den seno di e organisashon. Ku e obra di arte aki e artista Eugenie Boon, nasé na Kòrsou, ke duna Boneiru algu bèk ku ta rekonosibel i ku ta keda.