Inspekshon di labor i Asuntunan laboral ta fortifiká sosten i mantenshon
Hulanda Karibense - Trabou hustu, seif i salú kaminda tur hende na Hulanda Karibense mester por disfrutá di dje. Último tempu e unidat di Asuntu Sosial i Empleo (SZW) di Rijksdienst Caribisch Nederland a ripará ku e kantidat di pregunta i notifikashon tokante trabou a subi. Na mes momentu e situashon ta mas kompleho, di manera ku trabou di departamentu di Inspekshon i labor i Asuntunan laboral tambe a bira mas intensivo. Pa e motibu aki ta fortifiká e enfoke, ku mas kapasidat i mas atenshon pa informashon i sosten.
Dor di desaroyo di e último añanan – manera kresementu di ekonomia i poblashon, oumento di salario mínimo legal i desaroyonan den legislashon laboral – e nesesidat pa splikashon kla a oumentá. Na mes momentu e interes pa un bon supervishon i kontròl pa sigui e reglanan ta krese. Mas pregunta ta drenta tokante pago di salario, pèrmit di trabou, orario di trabou, ferlòf di dòkter, dianan di fakansi i prosedura di retiru.
E unidat SZW ta tene desaroyonan riba merkado laboral bon na bista. Riba kada isla tin otro desaroyo, pues e nesesidat pa informashon i notifikashon tambe ta diferensiá. P’esei ta wak kiko ta loke ku mester pa kada isla. Pa esei tin atenshon tantu pa dunadó di trabou komo empleado.
Fortifikashon di supervishon i sosten
Pa por reakshoná efektivamente riba e señalnan aki, ta fortifiká e métodonan di trabou di e departamentunan di Asuntunan laboral i Inspekshon di labor poko poko. A tuma empleado adishonal den servisio, inspektornan ta sigui treinen, i ta traha riba mehorashon di suministro di informashon. Di e manera aki ta pone énfasis riba hasi inspekshon mas spesífiko, un forma aktivo di trata notifikashon i preparashon pa seshon di informashon nobo pa dunadó di trabou i empleado.
E meta ta keda meskos: Trabou ku ta hustu (manera un bon pago), ta seif (sin rísiko riba daño) i ta salú (kaminda ku personanan no ta haña keho físiko ni mental).
Unda por bai?
Bon kondishon di trabou ta surgi dor di kolaborashon. Dunadó di trabou, empleado i tambe gobièrnu kada un tin su ròl den esaki. Un bon relashon entre dunadó di trabou i empleado hopi biaha ta yuda pa evitá problema. Si esaki no logra òf un hende ta duda den loke ta permití òf nò, e ora ei por tuma kontakto ku e unidat SZW.
Pa informashon i sosten por hasi uso di e siguiente medionan:
- Página di unidat SZW riba www.rijksdienstcn.com
- Orario di konsulta di Asuntunan laboral na ofisina di SZW na Boneiru, Sint Eustatius i Saba
- Foyeto grátis optenibel na ofisina òf pa download via www.rijksdienstcn.com