Hulanda Karibense ta fuertemente komprometí kontra trafikashon i kontrabanda di hende
Den 2025, Hulanda Karibense ta intensifiká su esfuerso pa kombatí trafikashon di hende i kontrabanda di hende. Trafikashon di hende ta un violashon serio di derecho humano, kaminda ta eksplotá individuonan fòrsá. E ta un krímen kompliká, kaminda víktima ta fòrsá pa hasi kos kontra di su boluntat, regularmente bou di menasa, engaño òf violensia. Víktimanan hopi biaha no ta realisá ku nan ta den un situashon di eksplotashon i ta biba den miedu i inseguridat. Trafikashon di hende tin diferente forma, manera: eksplotashon seksual, eksplotashon laboral, eksplotashon kriminal, òf kitamentu fòrsá di órgano.
E krímen aki tin konsekuensia grandi pa salú físiko i mental di e víktima i mester di envolvimentu aktivo di henter komunidat pa kombatí esaki na un manera efisiente. Durante henter aña lo tin aktividat- i kampañanan di konsientisashon na Boneiru, Sint Eustatius i Saba, ku ta duna informashon konkreto kon pa aktua tantu pa siudadano komo pa profeshonalnan.
E programa di aña a kuminsá den promé kuartal ku eventonan di ret na Saba i Sint Eustatius, pa stimulá kolaborashon entre partnernan di kadena di e islanan. Dia 14 di aprel lo tin un evento di ret na Boneiru, ku tambe ta inkluí treinen spesialisá riba siñalá e krímen aki i kiko por hasi. E treinen ta pa profeshonalnan den kadena hudisial i kuido.
Na yüni lo tin atenshon spesial pa Dia Internashonal Kontra Trabou di Mucha (12 di yüni), ku ta enfoká riba eksplotashon kriminal di menor di edat. Ta importante pa rekonosé eksplotashon kriminal bou di hóben trempan i aktivamente kombatí esaki. Por pone hóbennan bou di preshon pa transportá droga, hòrta kos òf pa laba plaka. Hopi biaha e ta parse un forma di gana sèn rápido, pero e víktima ta keda atrapá den un ret di eksplotashon i dependensia. Pa e motibu aki, e empeño ta pa traha aktivamente huntu ku skol- i institutonan edukativo pa hasi hóbennan resiliente i krea konsientisashon.
Durante henter aña lo tin kampañanan riba televishon, radio i media sosial, unda ta envolví públiko aktivamente ku e pregunta: “Kiko bo por hasi?” Tambe lo distribuí tarhetanan ku siñalnan, pa hende sa kon i unda por mèldu situashonnan sospechoso di forma anónimo.
Entrante ougùstùs lo bo mira e kampaña “Bo ta rekonosé e siñalnan?” ku diferente medionan di komunikashon manera ‘billboard’ digital, poster, i pamfleta. Klousura di e aña ta alrededor di 18 di òktober, Dia Nashonal kontra Trafikashon di Hende, ku aktividatnan grandi i un ‘media tour’ informativo.
Hulanda Karibense ta bisa bon klá “Nò” kontra trafikashon i kontrabanda di hende. Pero esaki no ta sufisiente. Bo tambe por yuda pa para e krímen aki. Rekonosé esaki i mèldu esaki. E mensahe prinsipal di e kampaña ta:
“Huntu kontra trafikashon di hende: nos islanan, nos responsabilidat”. Mèldu esaki!
Pa mas informashon i pa mèldu: sigui nos kampañanan via media sosial òf bishitá nos wèpsait. www.rijksdienstcn.com