A nombra miembro nobo na Voogdijraad Hulanda Karibense
Minister di Hustisia i Siguridat a nombra dos miembro nobo pa Voogdijraad Hulanda Karibense entrante promé di aprel 2025. Entretantu a nombra Señora E. Nicolaas (Boneiru) i señor A.D. Duinkerken (Saba) den nan funshon no pagá. E prosedura di rekrutashon pa un miembro di Sint Eustatius ainda ta andando.
Voogdijraad CN ta konsistí di tres miembro. Kada miembro ta representá un di e tres islanan Boneiru, Sint Eustatius i Saba. E ofisina di Voogdijraad ta informá Voogdijraad periódikamente i ta mantené nan na altura di e progreso. E ofisina ta traha diariamente na bienestar i protekshon di mucha i hóben na Boneiru, Sint Eustatius i Saba.
Resientemente señora A. Pourier-Beukenboom (Boneiru), eks-presidente, ku konfiansa a pasa su tareanan ofer na e miembronan nobo. Di e manera aki e ta pasa su konosementu i eksperensia balioso pa un transishon suave.
Direktor interino di Voogdijraad CN, B. Kraaijeveld ta gradisí señora Pourier-Beukenboom di kurason pa su dedikashon durante tur e añanan:
"Nos ta sumamente agradesido na dje pa su aporte duná durante tur e añanan. Ku nombramentu di señora Nicolaas i señor Duinkerken nos ta sigui komprometé nos mes na un protekshon optimal di mucha i hóben na Hulanda Karibense. Nos ta spera un kolaborashon éksitoso."
Ku e nombramentunan nobo aki Voogdijraad ta sigui dediká su mes na un futuro sigur i ku oportunidat pa tur mucha na Hulanda Karibense.
