Sosten pa trabou pa personanan ku distansia for di merkado laboral
Gabinete ta pone strukturalmente €4 mion disponibel pa personanan ku un distansia for di merkado laboral na Boneiru, Sint Eustatius i Saba. Esaki ta duna e grupo seguridat di por haña sosten den futuro tambe na momentu di haña un trabou adekuá. Si por serka un dunadó di trabou regular, sino na un lugá di trabou protehá.
"Tur hende tin talento. I tur hende ku tin esei mester por hasi algu kuné riba merkado laboral", segun sekretario di estado Jurgen Nobel (Participatie en Integratie). “P’esei mi ta haña ku esaki ta un paso hopi importante ku ta bini fondo disponibel strukturalmente pa personanan ku ta buska trabou na Boneiru, Sint Eustatius i Saba ku mester di un man pa yuda nan. Ku guia adishonal nan por partisipá aktivamente den sosiedat i hasi uso di nan talento.”
Pa basta tempu kaba entidatnan públiko di Boneiru, Sint Eustatius i Saba ta traha huntu ku ehekutornan lokal i dunadó di trabou pa sostené hende ku distansia for di merkado laboral pa i na trabou. Aki nan ta pone diferente instrumento disponibel. Trabou protehá ta pa personanan ku mester di un ambiente di trabou adaptá. Supsidio pa gastunan di salario ta stimulá dunadó di trabou pa tuma hende ku distansia for di merkado laboral na trabou. Coach di trabou ta sòru pa guia personal na trabou.
Último añanan kada bes e gabinete a pone fondo disponibel pa esaki. Ku e medida nobo awor tin fondo struktural disponibel. Dor di esaki personanan ku un distansia for di merkado laboral den área karibense di Hulanda, ta haña mas oportunidat awor i den futuro pa mas trabou pagá. Ku e medida aki gabinete ta sigui konseho di komishon mínimo sosial Hulanda Karibense.