E promé periodo di un kategoria nobo di e Areglo di supsidio pa Inisiativanan Sosial pasado di sklabitut transatlántiko pa e área karibense di Reino ta habri awe. Fundashon- i asosiashonnan por hasi un petishon pa supsidio den kategoria 2 pa inisiativanan sosial chikitu.
Bou di kategoria 2 ta kai: diferente proyekto relashoná ku pasado di sklabitut, organisamentu di enkuentro- òf eventonan ku ta kontribuí na prosesamentu di e pasado di sklabitut, proyektonan pa edukashon i ekspreshon artístiko, inkluyendo eksposishon i presentashon. E proyektonan mester ta na benefisio di desendientenan di esnan sklabisá (komunidat).
Montante di e supsidio
E montante di e supsidio pa kada petishon pa kategoria 2 ta mínimo USD 10.000 i máksimo USD 25.000. En total tin dos periodo pa kategoria 2 den kua organisashonnan por hasi un petishon. E promé periodo ta habrí di 1 di desèmber 2025 09.00 or di mainta CET te 12 di yanüari 2026 5 or di atardi CET. E di dos periodo ta habri komienso di 2028.
Tokante e areglo di supsidio
E areglo di supsidio ta un di e akshonnan relashoná ku e diskulpanan pa e pasado di sklabitut hulandes ku promé minister a pidi riba 19 di desèmber 2022. Pa e areglo di supsidio a pone pa e área karibense un presupuesto di mas di €29.3 mion na disposishon.
En total tin ocho (8) tanda di petishon pa kuater (4) diferente supsidio, repartí riba tres (3) aña, den kua organisashonnan por pidi supsidio pa proyektonan ku ta kontribuí na konsientisashon, rekonosementu i konmemorashon i mihó komprenshon di e influensia di pasado di sklabitut i su prosesamentu.
Mas informashon
Pa e parti karibense di Reino tin un wèpsait speshal, Legacy to Future Funds. Riba e wèpsait aki tin informashon tokante e areglo di supsidio i un referensia pa e wèpsait di Uitvoering Van Beleid (UVB) di Ministerio di Asuntunan Sosial i Empleo, ku ta ehekutá e areglo. Por entregá un petishon pa supsidio via e portada di supsidio di UVB. Informashon tokante e areglo i tokante e proseso di registrashon den e portada di petishon, ta disponibel na papiamentu, papiamento, ingles i hulandes.