Ayera e entidatnan públiko di Boneiru, St. Eustatius i Saba i e Ministerionan di Salubridat, Bienestar i Deporte (VWS), Hustisia i Seguridat (JenV), Enseñansa, Kultura i Siensia (OCW), Asuntunan Sosial i Labor (SZW) i Asuntunan Interno i Relashonnan den Reino (BZK) a firma e Akuerdo Atministrativo konhunto ‘Prevení i kombatí Violensia kontra Hende Muhé, Violensia Doméstiko i Maltrato di Mucha 2026–2029.’ Ku e akuerdo aki, e islanan i gobièrnu hulandes ta tuma e siguiente paso den protekshon di hende muhé, mucha i famianan na Hulanda Karibense.
Deskripshon di portrèt D.r.p.d.: Eric Bezem (Direktor-General Kastigu i Protekshon – Hustisia i Seguridat), Koen Becking (Sekretario di estado di Enseñansa Básiko i Emansipashon - Enseñansa, Kultura i Siensia), John Soliano (Gezaghèber di Boneiru), Judith Tielen (Sekretario di estado di Hubentut, Prevenshon i Deporte – Salubridat Públiko, Bienestar i Deporte), Alida Francis (Gezaghèber di Sint Eustatius), Eddie van Marum (Sekretario di estado di Asuntunan Interno i Relashonnan den Reino), Jurgen Nobel (Sekretario di estado di Partisipashon i Integrashon – Ministerio di Asuntunan Sosial i Empleo), Jonathan Johnson (Gezaghèber di Saba).
Kompromiso Konhunto
Tur partido enbolbí ta komprometé nan mes di e forma aki pa un komunidat kaminda seguridat i igualdat ta reina, kaminda no tin lugá pa violensia. E meta prinsipal di e akuerdo atministrativo ta pa sigui fortalesé prevenshon, detekshon, intervenshonnan i servisio di sosten i pa garantisá un koherensia mas grandi entre e akshonnan di e entidatnan públiko i ministerionan. Esaki ta enserá un kolaborashon mas estrecho i mas efisiente entre organisashonnan di sosten, establesimentu di un sentro di konosementu pa profeshonalnan i desaroyo di treinen pa siudadano i profeshonal. Ademas, Universidat di Leiden, den kolaborashon ku e entidatnan públiko i Ministerio di Salubridat, Bienestar i Deporte (VWS), ta lansa un estudio riba violensia seksual i komportashon seksual inapropiá.
Sekretario di Estado Tielen (Hubentut, Prevenshon i Deporte): “Mi ke pa mucha i hende muhé ta sigur i pa nan por progresá den bida gosando di un bon estado di salú: físiko, mentalo i sosialo. Violensia kontra hende muhé, violensia doméstiko i maltrato di mucha ta afektá no solamente e víktimanan, pero sosiedat den su totalidat. Falta skol, keda sin bai trabou, trouma i kuido informal bou di preshon ta konsekuensianan fèrfelu di e tipo di violensia aki. Nos por atendé e problema kompleho aki solamente di forma konhunto. Huntu ku polis i e kadena hudisial, sektor di kuido, enseñansa i kada siudadano ku ta sintié enbolbí ku un sosiedat seif i saludabel. Laga nos hasi tur loke nos por pa garantisá seguridat di mucha, hóben i hende muhé. Nan futuro ta nos futuro.”
Trahando huntu pa un kas sigur i un sosiedat sigur
E último añanan a tuma pasonan importante kaba na e islanan. Por ehèmpel, a establesé puntonan di konseho i notifikashon pa violensia doméstiko i maltrato di mucha, tin sentronan di refugio disponibel pa hende muhé i profeshonalnan ta risibí treinen pa rekonosé señalnan di violensia mihó. Tambe a lansa kampañanan di konsientisashon pa hasi violensia un tópiko di kòmbersashon. E akuerdo atministrativo nobo ta desaroyá e aserkamentu aki mas aleu. E ta kontribuí na e siguiente paso pa por ratifiká e Tratado di Istanbul na Hulanda Karibense. E tratado aki di Konseho di Europa ta konserní prevenshon i kombatimentu di violensia kontra hende muhé i violensia doméstiko.