Aspirantenan BKCN a terminá e promé blòk di e kurso Manschap A ku éksito

E komandantenan ta orguyoso di e grupo aki.  Bou di guia di dosente i instruktornan lokal, e aspirantenan ta demostrando progreso evidente i ta desaroyá nan mes den futuro bomberonan konfiabel.

Aktualmente nan ta partisipá den e servisio di warda.  Nan ta haña  eksperensia práktiko adishonal i mihó preparashon pa drenta akshon na momentu di un insidente. Esaki ta marka un paso importante pa nan kualifikashon final komo bombero na Kuerpo di Bombero Hulanda Karibense.

Na febrüari 2026, e aspirantenan lo kuminsá ku e di dos parti di e kurso: kombatimentu di kandela.  Despues nan lo sigui e parti di Kombatimentu di Insidente Aereo (IBL), ya ku Kuerpo di Bombero ta responsabel pa tantu e siudat komo e aeropuerto. Ehekushon di e parti aki ta programá pa yüni i yüli 2026.  Despues di kompletá e partinan aki, e aspirantenan  lo tin un formashon kompleto di akuerdo ku e eksigensianan di Kuerpo di Bombero Hulanda Karibense.

Ku e logro aki, e generashon nobo di aspirante ta yega un paso mas serka di nan futuro trabou pa siguridat di nos islanan i nan abitantenan.