Gabinete ke pa tur empleado di munisipionan i di entidatnan públiko Boneiru, Sint Eustatius i Saba ku ta traha ku pasport i sédula tin un Deklarashon di Bon Kondukta (VOG). P’esei konseho di minister a disidí di hiba kambio di e dekreto di pasport den konsulta. E medida mester yuda prevení froude ku dokumentonan di biahe i ta planiá pa drenta na vigor entrante 1 di yanüari 2027.
Den pasado a konstatá ku kriminalnan ta logra haña pasport hulandes na diferente munisipio. Empleadonan korupto tabata entregá pasport segun pedido a kambio di sèn. Ku un pasport asina un kriminal por ehèmpel por krusa frontera i sigui ku echo kastigabel pafó di alkanse di polis i hustisia. Esaki ta daña e konfiansa den e dokumento di biahe hulandes i ta sòru pa situashonnan insigur.
“No tin espasio pa froude i korupshon den gobièrnu,” sekretario di estado Eddie van Marum ta bisa. “Siudadanonan mester por konfia ku ta entregá pasport òf sédula di un manera seif i kuidadoso. Dor di skrin empleadonan ku ta hasi e trabou aki ku regularidat, nos ta redusí e riesgo di mal uzo i ta oumentá e seguridat di nos empleadonan i di komunidat.”
Deber di kuido pa kòntròl di VOG kada 2 aña
Un VOG ta un deklarashon ofisial ku un siudadano por hasi petishon pe. E ta indiká ku e petishonario no a kometé echonan kastigabel ku ta forma riesgo pa e funshon. E obligashon di VOG ta bai konta pa empleado ku un tin un kontrakt di trabou figo òf temporal, inkluso personal di hür, ku ta enbolbí den petishon i otorgashon di dokumentonan di biahe. Munisipionan i entidatnan públiko ta haña e deber di kuido pa skrin kada empleado na komienso di e relashon di trabou i seguidamente kada dos aña.
No tin gastu èkstra pa siudadano, munisipionan ni entidatnan públiko
A kompensá e gastunan anual pa obligashonnan di VOG via di e ‘legesstelsel’: ta redusí e parti di ‘leges’ di reino, ya asina petishonarionan di un dokumento di biahe, munisipionan i entidatnan públiko no mester paga èkstra.
Konsulta
E adaptashon proponé ta bai na vigor djamars 16 di dezèmber te ku 23 di febrüari. Via https://www.internetconsultatie.nl/verplichtevogreisdocumenten tur hende por reakshoná riba e proposishon. Despues ta hiba e proposishon mas aleu den prosedura. Ta ferwagt e kambio bai na vigor entrante 1 di yanüari 2027. Munisipio i entidatnan públiko seguidamente tin 1 aña di tempu pa kumpli ku e obligashon nobo.