Djaweps 18 di desèmber 2025 sindikatonan den e konsulta sektorial (ABVO, ACOM, NAPB i STrAF) i e direktor di RCN, komo presidente di e konsulta sektorial, a hasi palabrashonnan tokante kondishonnan di trabou di e personal di gobièrnu den servisio di Rijksdienst Caribisch Nederland (RCN). Ku esaki a duna kontenido na un palabrashon den e kondishonnan di trabou aktual.
Salario
Ta adaptá e porsentahe ku e salarionan ta subi kuné entrante yanüari 2026 di 1,5 pa 5,5 porshento, ku e palabrashon adishonal ku e subida di salario aki ta suma un mínimo di USD 150,- pa kada empleado ( proporshonal na e oranan di trabou). Ku esaki e dunadó di trabou i sindikatonan ta duna ekspreshon na e deseo general pa mehorá partikularmente e posishon di entrada di empleadonan den e promé parti di e struktura salarial. E kompensashonnan relashoná ku salario ta subi ku mesun porsentahe.
Kompensashon warda iregular
Entrante 2026 empleadonan ku ta traha warda segun roster ta mantené e kompensashon di warda iregular na momentu ku tuma fakansi tambe.
Penshun
E montante máksimo riba kual no ta kalkulá penshun (‘aftoppingsgrens’) lo oumentá ku 5,5% entrante 1 di yanüari 2026, na lugá di e 1,5% ku a akordá anteriormente, pa USD 59.750.
Konsulta
Den e konsulta a hiba kombersashon tambe tokante di e ambishonnan riba tereno di maneho di personal konsiente di e fase di bida, inkluso ferlòf di mayor pa kuido di yu. E kombersashonnan tabata konstruktivo i ta rekerí elaborashon mas detayá den 2026.
Background
Na desèmber 2023 e organisashonnan sindikal i direktor di RCN a sera un akuerdo laboral pa e periodo di 2024-2026. E tempu ei a hasi palabrashon ku na momentu ku rekursonan finansiero bira disponibel lo hasi un konsulta di nobo.
A duna kontenido na esaki pa promé biaha na dezèmber 2024 den un adèndum. E akuerdonan ku a hasí awor den e di dos adèndum ta drenta na vigor entrante yanüari 2026."