Outoridat Konsumidó i Merkado (Autoriteit Consument & Markt) (ACM) a stipulá e tarifanan máksimo pa koriente i awa di bebe na Boneiru, Sint Eustatius i Saba pa 2026. ACM ta hasi esaki anualmente i ora hasi esei ta paga tinu pa klientenan no paga di mas i pa kompanianan di koriente i awa di bebe tin sufisiente espasio finansiero pa invershonnan nesesario pa mantené e ritmo di kresementu riba e islanan i pa invertí den durabilidat.
Pa stimulá durabilidat, den 2026 pa promé bia e tarifanan máksimo pa Boneiru, Sint Eustatius i Saba ta basá tambe riba un insentivo pa produktornan di koriente pa lanta e parti di koriente produsí di forma duradero. Hasi produkshon di energia i di awa di bebe duradero riba e islanan no ta solamente bon pa klima, pero e ta pèrkurá tambe pa preis di energia i awa di bebe riba e islanan ta ménos dependiente di e preisnan di kombustibel ku ta fluktua. Preis di kombustibel na e momentunan akí ainda tin un impakto signifikante riba altura di e tarifanan, pasobra ainda ta hasi hopi uso di kombustibel fosil pa produkshon di koriente i awa di bebe. ACM, ora ta bai stipulá tarifa e aña akí, ta pidi tambe pa pone èkstra atenshon na e pèrdida grandi debí na lèkashi kontinuo riba e ret di awa di bebe di Sint Eustatius.
Komo ku ministerio di Klima i Kresementu Bèrdè i ministerio di Infrastruktura i Maneho di Awa ta supsidiá sierto tarifa di koriente i awa di bebe, sierto preisku klientenan mester paga ta mas abou ku e tarifanan máksimo ku ACM a stipulá. Na e momentunan akí no ta konosí ainda kon haltu e supsidionan ei lo bira.
Boneiru
Na Boneiru e tarifa máksimo pa uzo di koriente ta subi di mas òf ménos 0,32 USD/kWh na mas òf ménos 0,39 USD/kWh. Pa uzo di un kas di famia promedio (mas òf ménos 210 kWh pa luna) esaki ta nifiká ku un kliente lo tin ku bai paga mas òf ménos 14 USD mas pa luna pa uzo di koriente entrante 1 di yanüari 2026. E tarifa fiho máksimo pa koriente ta subi ku mas òf ménos 6%, pa kua altura di e tarifa ta dependé di e peso di e konekshon. E límite mas haltu di e tarifa di pagabon (pre pagá) ta subi ku mas òf ménos 0,65 USD/kWh na mas òf ménos 0,74 USD/kWh. E tarifa máksimo pa uzo di awa di bebe ta subi di mas òf ménos 4,06 USD/m3 na mas òf ménos 4,48 USD/m3. Pa un kas di famia promedio (mas òf ménos 10 m3 pa luna) esaki ta nifiká un subida di mas òf ménos 4 USD pa luna riba e kuenta. E tarifa fiho máksimo pa un kas di famia ta subi di 51,23 USD pa luna na 55,61 pa luna. Den tur e sumanan akí no a tene kuenta ainda ku e supsidio.
Saba
Na Saba e tarifa máksimo pa uzo di koriente ta subi di mas òf ménos 0,39 USD/kWh pa mas òf ménos 0,48 USD/kWh. Pa uzo di parti di un kas di famia promedio esaki ta nifiká ku un kliente na Saba lo tin ku paga mas òf ménos 19 USD pa luna mas na uzo di koriente entrante 1 di yanüari 2026. E tarifa fiho máksimo pa koriente ta subi ku mas òf ménos 15%. Den tur e sumanan akí no a tene kuenta ainda ku supsidio.
Sint Eustatius
Na Sint Eustatius e tarifa máksimo pa uzo di koriente ta subi di mas òf ménos 0,28 USD/kWh pa mas òf ménos 0,33 USD/kWh. Pa uzo di parti di un kas di famia promedio esaki ta nifiká ku un kliente lo bai paga mas òf ménos 10 USD mas pa luna na koriente entrante 1 di yanüari 2026. E tarifa fiho máksimo di koriente ta subi ku mas òf ménos 3%. E tarifa máksimo pa uzo di awa di bebe ta subi di mas òf ménos 11,30 USD/m3 pa mas òf ménos 14,94 USD/m3. Esaki tin di aber tambe ku e pèrdidagrandi debí na lèkashi kontinuo. Pa un kas di famia promedio subida di e tarifa máksimo di awa di bebe ta nifiká un subida di mas òf ménos 36 USD pa luna riba e kuenta. E tarifa fiho máksimo pa un kas di famia ta subi di 72,67 USD pa luna na 82,66 USD pa luna.
Den e sumanan akí tampoko no a tene kuenta ainda ku supsidio.