Lansamentu di rijkscultuurfondsen.org: ayudo pa petishon di supsidio pa e islanan karibense
For di 28 di yanüari, organisashonnan kultural i kreadornan na Aruba, Boneiru, Kòrsou, Saba, Sint Eustatius i Sint Maarten por akudí na rijkscultuurfondsen.org. E wèpsait nobo akí ta un guia kla pa e seis fondonan kultural di Reino, na unda por haña un selekshon di posibilidatnan di supsidio.
Dikon rijkscultuurfondsen.org?
E wèpsait a nase den kombersashon ku kreadornan kultural i organisashonnan riba e islanan karibense. For di kombersashon-, bishita- di trabou i interkambionan e idea a nase pa establesé un sitio digital kaminda kreadornan i organisashonnan por haña fásilmente un fondo adekuá i areglonan di supsidio korespondiente. Rijkscultuurfondsen.org ta un plataforma sentral ku ta guia petishonarionan paso a paso na e posibilidatnan ku ta pas mas mihó ku nan plan kultural.
Haña e supsidio adekuá den 2 stap
Un di e funshonnan mas importante di e wèpsait ta e ayudo digital pa petishon; un hèrmènt pa filtra, trahá na midí, ku kual e usuario ta mira den dos stap e areglonan ku ta pas mas mihó ku su plan kultural. Ademas, e wèpsait ta ofresé resúmennan di un selekshon di areglonan di supsidio pa kada fondo, ofresé den kuater idioma: ingles, papiamentu, papiamento i hulandes. Unabes ku bo a filtra e areglo ku ta pas mas mihó ku bo plan, ta referí bo na e wèpsait di e fondo korekto.
Gilia Croes, trahadó di maneho di Enseñansa, Kultura i Siensia Hulanda Karibense (OCW), tokante rijkscultuurfondsen.org: “E tereno kultural den Karibe ta yená ku potensial, pero hopi kreador i organisashon kultural ta duda pa sambuyá den e oséano profundo di supsidionan disponibel. Por ta difísil pa eksplorá i haña bo kaminda den tur e posibilidatnan ku tin. E wèpsait akí ta brinda un guia útil i ta sirbi komo un kompas ku ta yuda kreativonan karibense nabegá e lamannan bruto di supsidio kultural. Lusando kaminda pa yega na rekursonan finansiero, e plataforma ta permití kreativonan karibense akseso na diferente opshon pa duna bida na nan vishon i saka fruta di nan potensial.”
Pa kreadornan den henter Reino
E fondonan kultural di Reino ta dediká nan mes na hasi arte i kultura aksesibel pa tur hende, na Hulanda Oropeo i Hulanda Karibense. Nan ta stimulá inovashon, desaroyo di talento i konekshon entre kreadornan, organisashonnan i públiko den henter Reino.
E wèpsait ta diseñá dor di e diseñadó arubiano Carla Garcia i ta enfatisá e konekshon akí: "E identidat visual di rijkscultuurfondsen.org ta inspirá pa e patrimonio kultural di e parti Karibense di Reino. E konsepto di diseño ta enfatisá intersekshonnan, konekshonnan, i límitenan, kual ta presentá kolaborashonnan i kamindanan kompartí na un manera visual.”
Seis fondo kultural di Reino
Ta manehá e wèpsait na nòmber di e seis fondonan kultural di Reino: Nederlands Filmfonds, Fonds Podiumkunsten, Fonds voor Cultuurparticipatie, Mondriaan Fonds, Nederlands Letterenfonds i Stimuleringsfonds Creatieve Industrie.
E fondonan akí, finansiá pa ministerio di Enseñansa, Kultura i Siensia (OCW), ta duna sosten finansiero na organisashonnan kultural i kreadornan den henter Reino. Huntu nan ta finansiá tur disiplina kultural: arkitektura, kultura digital, diseño, arte visual, patrimonio, pelíkula, literatura, arte di riba tarima i partisipashon i edukashon kultural.
Bishitá rijkscultuurfondsen.org i deskubrí kon e fondonan kultural di Reino por yuda bo hasi bo plannan kultural posibel.