Kambio proposishon di lei WolBES/FinBES Funshon di Representante di Reino ta keda sí, pero ta bira otro
Sekretario di Estado Zsolt Szabó (Digitalisashon i Relashonnan den Reino) ke mantené e funshon di Representante di Reino, pero ke adaptá esaki sí. Ta inkorporá e adaptashon aki den e proposishon di lei pa kambio di e Lei Entidatnan Públiko Boneiru, Sint Eustatius i Saba (WolBES) i e Lei di Finansa Entidatnan Públiko Boneiru, Sint Eustatius i Saba (FinBES). E proposishon di lei mester kontribuí na bon gobernashon i solides finansiero.
Zsolt Szabó: “Supervishon Intergubernamental, kaminda i na momentu nesesario, ta rekerí un embolbimentu gubernamental intensivo. Esaki por haña un forma mas efektivo i mas adekuado pa medio di e Representante di Reino ku pa medio di un mandatario na Den Haag. E Representante di Reino ta muchu mas ekipá pa ta presente na e lokashon i konosé e situashonnan partikular di e gobernashon di Boneiru, Sint Eustatius i Saba.”
Kontenido di e funshon di Representante di Reino ta kambia
E funshon di Representante di Reino ta keda eksistí, pero algun punto di e kontenido di e funshon akí ta bai kambia. E Representante di Reino lo bai dediká su mes mas ku promové i garantisá bon gobernashon i ehekutá supervishon intergubernamental.
Boneiru, Sint Eustatius i Saba ademas a indiká di ta aspirá un propio representashon permanente na Den Haag. A konsekuensia di esaki e ròl di koordinashon di e Representante di Reino, komo defensor di interes di Boneiru, Sint Eustatius i Saba, no ta nesesario òf ta ménos nesesario. E Kolegionan Ehekutivo ta na altura kaba tokante e kambionan den e proposishon di lei.
Planifikashon di tempu di e proposishon di lei
E simannan benidero ta adaptá e proposishon di lei pa esaki. Den e di dos kuartal di 2025 ta tuma lugá un konsulta nobo pa medio di internèt tokante e adaptashonnan den e proposishon di lei. Esaki ta nifiká ku probablemente den e promé kuartal di 2026 ta manda e proposishon di lei pa Tweede Kamer.
E planifikashon adaptá tin konsekuensia pa un otro kambio den e proposishon di lei, spesífikamente e oumento di e kantidat di miembro pa Konseho Insular. Ku e planifikashon nobo por spera ku e kambio di lei akí lo no drenta na vigor promé ku e elekshonnan pa Konsehonan Insular di mart 2027. Pa e motibu akí e oumento di kantidat di miembro di Konseho Insular lo drenta na vigor te entrante 2031.