Sekretario di Estado Vincent Karremans (Hubentut, Prevenshon i Deporte) ta bishitá Boneiru, Sint Eustatius i Saba
Sekretario di Estado Vincent Karremans (Hubentut, Prevenshon i Deporte) ta hasi un bishita di trabou na Boneiru, Sint Eustatius i Saba di 9 pa 15 di febrüari 2025. E ta bishitá diferente instituto di kuido i sosial i ta hiba kombersashon tokante desafio- i posibilidatnan relashoná ku salubridat, kuido di hóben, sosten sosial i prevenshon na Hulanda Karibense.
Den e kombersashon- i bishitanan na e islanan lo tin atenshon spesial pa mehorashon di e proseso di referensia relashoná ku traslado médiko, manera Sekretario di Estado Karremans a primintí e otoño aki den e debate di komishon den Tweede Kamer tokante kuido na Hulanda Karibense.
Saba
E bishita di trabou di Sekretario di Estado ta kuminsá na Saba. Aki e ta topa ku Kolegio Ehekutivo i ta hasi un bishita na Saba Cares Foundation. E tópikonan prinsipal di e kombersashonnan ta kuido di salú riba e isla, ku atenshon spesial pa kuido na kas i sosten sosial. Durante di bishita na e sala di gimnasio na Saba lo hiba kombersashon tokante e importansia di deporte i aktividatnan despues di skol pa hubentut.
Sint Eustatius
Na Sint Eustatius e Sekretario di Estado lo hasi un bishita na Sint Eustatius Health Care Foundation, Auxiliary Home i e community center, kaminda e enfoke ta riba kuido pa personanan di edat avansá i sosten pa e gruponan vulnerabel. Tambe e ta bishitá un famia di kriansa, kaminda reklutashon di famianan di kriansa nobo ta pará sentral. Den un kombersashon ku gezaghèber suplente i Kolegio Ehekutivo, lo deliberá tokante sosten pa kuido, maneho di hubentut i maneho sosial.
Boneiru
Na Boneiru Karremans lo topa ku representantenan di Fundashon Mariadal, kuido primario i kas di kuido. Tópikonan manera aksesibilidat di kuido i digitalisashon ta pará sentral. Ademas e ta hasi un bishita na Stichting Cocari II, kaminda ku e lo hiba kombersashon ku personanan di edat avansá tokante di nan eksperensia i sosten ku nan ta risibí. Tambe e lo bishitá e ofisina di Kuido i Hubentut Hulanda Karibense pa papia ku e empleadonan tokante di nan eksperensia ku servisio den kuadro di kuido, kuido pa hubentut i sosten sosial riba e tres (3) islanan di Hulanda karibense.
Lo terminá e bishita ku firmamentu di un akuerdo ku Entidat Públiko Boneiru i Jantje Beton pa sigui stimulá rekreashon i movementu pa mucha. Despues lo sigui ku apertura di un Special Cruyff Court nobo na Boneiru pa personanan ku limitashon.