Apertura di e Cruyff Court na Fundashon Kuido pa Personanan Desabilitá
Kralendijk – Ku apertura ofisial di e Cruyff Court Ban Hasi Sport na Fundashon Kuido pa Personanan Desabilitá (FKPD), Boneiru a optené un mas fasilidat deportivo inklusivo. Awe un delegashon spesial a inougurá e Cruyff Court, spesialmente diseñá pa persona ku limitashon. E delegashon spesial ta konsistí di e Diputado di Komunidat i Kuido Boneiru, Nina den Heyer, Sekretario di Estado pa Hubentut, Prevenshon i Deporte di Ministerio di Salubridat, Bienestar i Deporte (VWS), Vincent Karremans, direktor-gerente di Johan Cruyff Foundation, Niels Meijer, i Louella Rooijer, miembro di Kolegio di Supervishon di FKPD.
E Cruyff Court ta brinda un ambiente úniko i seif pa persona ku limitashon por praktiká deporte, ehersé un desafio físiko pa nan mes i forma parti di e komunidat. E Cruyff Court ta resultado di un kolaborashon estrecho entre Cruyff Foundation, Gobièrnu lokal di Boneiru i FKPD, ku e meta pa oumentá akseso na deporte i moveshon físiko pa persona ku limitashon.
Nina den Heyer, Diputado di Komunidat i Kuido Boneiru:
"Apertura di e 'Cruyff Court' akí ta un momentu ku nos komo komunidat por ta orguyoso di dje. No solamente e ta brinda un lugá pa praktiká deporte i moveshon físiko, pero tambe e ta fortalesé e sintimentu di konekshon i igualdat. Mi ta kontentu ku nos por a realisá e fasilidat aki huntu ku Ministerio di VWS, Cruyff Foundation i FKPD."
Vincent Karremans, Sekretario di Estado pa Hubentut, Prevenshon & Deporte:
"Deporte i moveshon físiko ta un obligashon. Nos ta trahá pa esaki. Esaki ta agradabel, saludabel i ta mantené bo den bon kondishon físikamente i mentalmente. Siñá na chikí ta pa bida largu, pues laga nos enkurashá tur hende, hóben i adulto, pa bin drenta den moveshon físiko. Asta pa esnan ku awor esaki ta difísil, por ehèmpel pa motibu di un limitashon. Mi lema ta: lanta tur hende for di riba e sofá. Ku e tremendo Cruyff Court nobo akí na Boneiru, lo ta mas fásil pa awe mes ainda hopi hende drenta den moveshon físiko."
Niels Meijer, Direktor-gerente di Cruyff Foundation:
"Cruyff Foundation ta komprometé su mes na un mundo den kua tur hende, independientemente di nan limitashon, por partisipá na deporte. E Cruyff Court na Boneiru ta un bon ehèmpel di kon deporte tin poder pa trese hende huntu. Nos ta orguyoso ku huntu ku e partnernan lokal por a logra esaki."
Edilse Goeloe, Direktor di Fundashon Kuido pa Personanan Desabilitá:
"E Cruyff Court akí pa nos ta un soño ku a bira realidat. Esaki no solamente ta duna e personanan ku nos ta sostené diariamente e oportunidat di ta físikamente aktivo, pero tambe ta fortalesé nan konfiansa den nan mes. Esaki ta un paso importante pa inklushon di persona ku un limitashon na Boneiru."
Ku apertura di e Cruyff Court ta duna un kontribushon balioso na promoshon di inklushon i oumento di oportunidat pa persona ku limitashon partisipá aktivamente na komunidat.