Jantje Beton, VWS i Entidat Públiko Boneiru a firma Akuerdo pa rekreá (Speelakkoord)

Notisia | 14-02-2025 | 21:19

E akuerdo akí ta enfoká riba realisashon di espasionan pa rekreá seif, desafiante i aksesibel, pa asina kada mucha na Boneiru por desaroyá su mes físikamente, sosialmente i emoshonalmente den un ambiente di bida saludabel. Nina den Heyer, diputado di Komunidat i Kuido Boneiru, Vincent Karremans, Sekretario di Estado di Hubentut, Prevenshon i Deporte di VWS, i Mascha van Werven, direktor-gerente di Jantje Beton a firma e Akuerdo pa Rekreashon. E momento simbóliko akí a tuma lugá na e parke di rekreashon di Nieuw Amsterdam, ku pronto ta habri su portanan.

Kolaborashon pa mas i mihó espasio pa hunga

Den e Akuerdo pa Rekreá (Speelakkoord) a stipulá kolaborashon entre e tres partidonan pa e periodo di 2025-2027. Den e akuerdo a stipulá palabrashon konkreto tokante konstrukshon, mantenshon i aksesibilidat di parke di rekreá i parke na Boneiru. Trahando huntu, espasionan pa rekreá seif i ku ta inspirá pa rekreá  ta bira mas aksesibel pa tur mucha na Boneiru, di manera ku nan por desaroyá nan mes físikamente, sosialmente i emoshonalmente.

Nina den Heyer, Diputado di Komunidat i Kuido Boneiru:

"Nos ta sumamente kontentu ku firmamentu di e akuerdo akí. Esaki ta un paso importante den mehorashon di e ambiente di bida di nos muchanan. Trahando huntu ku Jantje Beton i VWS, nos por garantisá ku tur mucha na Boneiru tin derecho di rekreá. E parke di rekreashon di Nieuw Amsterdam ta un bon ehèmpel di loke nos por logra huntu."

Vincent Karremans, Sekretario di Estado di VWS:

"Hunga ta sumamente importante pa mucha. Na promé lugá, naturalmente, pa dibertí huntu. Pero tambe pa ta pafó i move bo kurpa i asina pa sinti bo konfortabel, físikamente i mentalmente. Huntu ku Boneiru i Jantje Beton, nos lo regla pa krea mas espasio pa rekreá, kaminda ku muchanan por bai fásilmente i seif. Asina por tin pa kada mucha i kada mayor un alternativa alegre i saludabel na lugá di sinta na kas ku un pantaya."

Mascha van Werven, director-gerente di Jantje Beton:

"Jantje Beton ta empeñá pa e interes di rekreá pa tur mucha, sin importá unda nan ta biba. E Akuerdo pa Rekreá (Speelakkoord) akí ta hasi posibel pa mehorá e klima di rekreá na Boneiru i pa alkansá mas tantu mucha posibel. E periodo tras di lomba ku finansiamentu di VWS i OLB nos por a desaroyá kuater (4) sitio pa rekreá. Na 2024 un biaha mas nos a risibí un tremendo kontribushon di Nationale Postcode Loterij, di manera ku esaki ta permití nos realisá dos (2) sitio mas pa rekreá i di enkuentro na Boneiru. Nos no por hasi esaki nos so, nos tin mester di Entidat Públiko Boneiru i VWS pa esaki. Nos ta sumamente kontentu ku e kolaborashon akí i e pasonan ku nos por tuma huntu, pa hasi rekreashon aksesibel pa tur mucha na Boneiru."

Tokante Jantje Beton

Jantje Beton ta e outoridat riba tereno di rekreá pafó i ta empeñá pa e derecho di mucha pa por rekreá den aire liber i seif pa mas ku 50 aña. Rekreá no ta solamente plasentero, pero tin tambe un ròl importante, den e desaroyo físiko, sosial i mental di e muchanan. Komo eksperto den rekreá pafó, Jantje Beton ta traha ku munisipio, skol, inisiativa di bario i otro partner pa mehorá ambiente di rekreá i pa enkurashá mucha pa rekreá mas pafó.

Ku nan konosementu profundo di desaroyo di espasio di rekreá, investigashon den komportashon di rekreá i añanan di eksperensia práktiko, nan ta sostené proyekto i inisiativa ku ta kontribuí na un ambiente agradabel pa rekreá. Esaki nan ta hasi tantu na Hulanda komo den e parti Karibense di Reino, kaminda nan ta traha huntu ku gobièrnu lokal i komunidat riba solushonnan di hunga duradero. Pasobra unda ku bo ta biba, kada mucha mester por rekreá pafó, tur dia!