Programa espasial edukashonal den kolaborashon ku Da Vinci Satellite, SGB Liseo i Sterk Techniek Onderwijs
Di 24 te ku 28 di febrüari ‘Kabinet van de Speciaal Gezant’, SGB Liseo i ‘Sterk Techniek Onderwijs’ (STO) ta organisá un programa espasial edukashonal huntu ku diferente skol básiko i ‘Da Vinci Satellite-team’ (DVS) di TU Delft. E programa aki ta pa alumnonan di VWO 4 di Liseo i pa alumnonan for di grupo 8 di diferente skol básiko na Boneiru.
Hasi programa espasial i materianan di siensia aksesibel
E meta di e inisiativa ta pa laga alumnonan sera konosí ku e materianan di siensia i astronóutika di un manera inspirativo i aksesibel. Asina nan no ta solamente haña un mihó bista riba e área di ekspertísio, pero tambe ta stimulá nan pa pensa tokante estudionan ku nan ke sigui despues den siensia, teknologia i inovashon. Ademas, e programa ta mustra kon e programa espasial ta kontribuí na progreso teknológiko, sostenibilidat i inovashon den bida diario.
Durante e programa e alumnonan ta haña lès interaktivo, kaminda nan ta sera konosì ku e stashon di tera Galileo na Boneiru anto kon esaki ta funshonà. Pa medio di un rekorido i presentashon nan ta mira kon e stashon ta funshoná i tambe kon ta apliká e data ku ta kolektá den bida diario. Na fin di siman, e muchanan ta rekohé nan sertifikado pa kompletá e kurso di eksplorashon espasial ku éksito. E chèri riba e bolo ta ku nan ta hasi esaki manera astronout di bèrdat ku kuminda di astronout.
Interkambio di konosementu
Pa hasi e impakto di e programa mas grandi, ta duna dosentenan un treinen. Di e forma aki nan por sigui usa e material di lès den futuro i kompartí esaki ku futuro generashon di alumnonan. Ademas, dosentenan di Sint Eustatius i Saba tambe ta forma parti di e treinen, di kual ta fortifiká interkambio di konosementu den e parti Karibense di Reino.
E programa edukativo aki ta kontribuí na mas konosementu di siensia i teknologia den region. Eta ofresé alumnonan na Boneiru, Sint Eustatius i Saba un oportunidat úniko pa eksperensiá teknologia di astronóutika di aserka i pa deskubrí kua ròl e parti Karibense di Reino tin riba nivel internashonal.