Kalkulashon rápido di desaroyo di preis na Boneiru
For di e aña aki CBS ta publiká un kalkulashon rápido di desaroyo di preis na Boneiru den e lunanan promé ku fin di kada trimèster. E kalkulashon aki ta duna un indikashon di e inflashon. Pa e promé trimèster di 2025, e kambio tentativo di trimèster ta +1.8% i e kambio tentativo anual ta +3.5%.
Kiko e kalkulashon rápido ta enserá?
E kalkulashon rápido ta duna un estimashon di e desaroyo di preis pa e trimèster aktual, basá riba e datonan disponibel te na e punto ei. Pa e kalkulashon aki, CBS ta publiká solamente e kambionan (tentativo) di trimèster i anual den e índise di preis di konsumidó (CPI). No ta publiká e sifra di índise. E kambionan no ta adekuá pa indeksashon.
Ta hasi e kalkulashonnan rápido na e momento aki solamente pa Boneiru. Pa Sint Eustatius i Saba e material di fuente aktualmente no ta sufisiente pa un kalkulashon rápido.
Kiko ta e CPI?
Un biaha pa kada trimèster CBS ta publiká e desaroyo di preis di produkto- i servisionan di konsumidó riba e islanan di Boneiru, Sint Eustatius i Saba.Ta mustra e desaroyo di preis komo un índise di preis: e índise di preis di konsumidó (CPI). E kambio anual den e CPI ta un indikashon importante di inflashon.
Ki tipo di investigashon ta hasi?
E investigashon ta basá riba opservashon mensual di preisnan di produkto i servisio pa konsumidó. Ta usa e opservashon di preis mensual pa kalkulá preisnan promedio pa trimèster. Ta kalkulá e índisenan di preis di gruponan di merkansia a base di e preisnan promedio aki. Ta kalkulá i agregá e índisenan di preis di e gruponan di merkansia na e índise di preis total di konsumidó.
Kua método di opservashon?
Ta anotá algun di e preisnan pa opservadónan den tiendanan. Banda di esaki, CBS ta usa enkuesta por eskrito i opservashon riba internèt.