Veredikto: Hues ta konfirmá urgensia na Selibon, ta pone responsabilidat serka Kolegio ehekutivo
Korte di Promé Instansia di Boneiru, djabièrnè 21 di febrüari, a pone responsabilidat pa e situashon na Selibon Lagun bèk serka kolegio ehekutivo di Boneiru. E veredikto ta konfirmá ku tabatin negligensia di tarea riba tereno di dunamentu di pèrmit i mantenshon di lei. Hues ta konkluí sinembargo ku kolegio ehekutivo di Entidat Públiko Boneiru (EPB) mester a haña un último oportunidat tòg pa solushoná e asuntunan. Hues ta yama e medidanan ku Representante di Reino interino (wRv) entretantu a tuma, deseabel i nesesario i ta mantené nan.
For di momentu ku a tuma ofer e tareanan (‘indeplaatsstelling’) nai novèmber 2024 a hasi hopi bou di responsabilidat di Representante di Reino interino (wRv), pa atendé e problemátika na Selibon Lagun. Entretantu a restorá kasi tur violashon urgente di lei i regulashon na e sentro di sushi, di manera ku a evitá riesgonan agudo riba término kòrtiku.
Sushi dañino
Fin di yanüari 2025 ya kaba a drecha e kònteinernan ku sushi ku ta kontené asbèst i tin kònteiner pa asbèst nobo riba e tereno. Awor ta prosesá e sobrá di karni di matadero korektamente, e kurá di e sentro di sushi ta kumpli ku reglanan i a intensifiká protekshon di e sentro di sushi.
Último medidanan
Pa sushi biomédiko a haña un solushon, pronto lo pone un kònteiner friu nobo. Pa transportá sushi biomédiko aktualmente presente, a barka awor material di transporte speshal for di Hulanda. Nan ta yega den mart, despues di kua ta kuminsá ku paketamentu di nobo di e nuebe kònteinernan. Despues ta transportá e sushi biomédiko pa Hulanda, pa distruí esaki aya.
Ta na kolegio ehekutivo pa kontinuá
Awor ta keda na kolegio ehekutivo pa finalisá i konektá e último medidanan rápidamente i adekuadamente ku e maneho di sushi pa término largu. Representant di Reino interino (wRv) ta entregá e medidanan inisiá i kompletá den man di kolegio ehekutivo.
Pa Representante di Reino interino (wRv) ta krusial pa den bon kolaborashon logra resultadonan rápido i konkreto. E ta kontinuá ku e supervishon inter-atministrativo den kuadro di Selibon, ku komo meta, un solushon struktural pa un maneho di sushi sano i seif na Boneiru.