Desaroyo ekonómiko den e parti karibense di Reino

Notisia | 10-03-2025 | 19:08

Desaroyo ekonómiko i kapasidat pa para riba propio pia

Gabinete kier traha huntu ku gobièrnu-, empresario- i partidonan di interes públiko i privá riba e islanan, riba solushonnan konkreto pa desaroyá ekonomia di e islanan mas. Pa tur e islanan ta konta ku nan mes ta responsabel pa esaki. Pa loke ta trata Boneiru, Sint Eustatius i Saba, Gobièrnu Sentral tambe tin un papel pa promové desaroyo ekonómiko i e kapasidat pa para riba propio pia. A trabes di e Paketenan di Pais, Hulanda ta sostené e paisnan outónomo.

Sekretario di estado Szabó: “un vishon di término largu pa ekonomia ku tin sosten amplio, sufisiente invershon públiko, un merkado di kapital ku ta funshoná bon i bon koperashon regional, banda di bon gobernashon i un gobièrnu finansieramente sano, ta importante pa desaroyo ekonómiko i e kapasidat pa para riba propio pia. Esaki ta esensial pa mehorashon di kondishonnan di bida i pa ofresé oportunidat nobo pa habitante- i empresarionan di e parti karibense di nos Reino.”

Minister Beljaarts: "Pa un ekonomia fuerte i pa ta prepará pa futuro den e parti karibense di nos Reino, un aserkamentu bon kla, dirigí riba invershon i bon koperashon ta krusial. Dor di duna espasio na empresarionan i ofresé habitantenan perspektiva, nos ta fortifiká resistensia ekonómiko di e region."

Prioridatnan ekonómiko di Boneiru, Sint Eustatius i Saba

A pidi kada isla pa duna di konosé kiko nan ta mira komo e prioridatnan ekonómiko mas importante, tantu riba término kòrtiku komo término largu. Asina por ehèmpel Boneiru ta trahariba turismo duradero i fortifikashon di e infrastruktura, Sint Eustatius ta konsentrá riba mas desaroyo di patrimonio kultural-históriko i turismo i Saba ta enfoká riba fortifikashon di ekoturismo i desaroyo di haf. Pa tur isla ta konta ku e ‘Regio Deals’ otorgá lo kontribuí na realisashon di e plannan.

For di diferente rapòrt i kòmbersashon ku empresarionan, e entidatnan públiko i sosiedat sivil ta bin sinku tarea importante dilanti ku no ta nobo, pero ku si ta importante pa desaroyo ekonómiko. Asina por ehèmpel akseso na servisionan bankario i finansiamentu ta nesesario pa promoshon di klima di invershon. Otro kondishonnan esensial ta konektividat i infrastruktura, ménos gastu di transporte i preshon di regulashon, un merkado laboral ku ta funshoná bon, digitalisashon i disponibilidat di dato.

Sosten dirigí riba desaroyo ekonómiko di Paisnan outónomo

Maneho di desaroyo ekonómiko ta un asuntu outónomo di Aruba, Kòrsou i Sint Maarten mes. For di Hulanda ta traha ku e paisnan karibense riba finansiamentu aksesibel pa MKB ku Garantia pa kréditonan di MKB. A base di palabrashonnan ku a hasi den e Paketenan di Pais, ta koperá pa un mihó konekshon entre enseñansa i merkado laboral i digitalisashon.

Na Sint Maarten ta realisando invershonnan den infrastruktura, a trabes di e Fondo di Maneho pa Rekonstrukshon di Sint Maarten di Banko Mundial. Ademas, na Kòrsou ta kolaborando pa desaroyá un kadena di hidrógeno bèrdè i ‘Caribbean Regional Technical Assistance Centre’ (CARTAC) ta dunando sosten den tur e tres paisnan karibense.

Ménos dependensia di importashon di kuminda

Seguridat di alimento ta un tema importante riba tur e seis islanan. Pa gran parti nan ta dependé di importashon di kuminda for di eksterior, loke ta hasi nan vulnerabel i ta kondusí na preis di kuminda haltu. Pa atendé ku e retonan akí, gabinete a asigná 24 mion euro, pa oumentá seguridat di alimento i redusí dependensia di importashon riba término. Sekretario di estado Szabó a nombra un ‘kwartiermaker’ ku ta bai investigá kua instrumento ta mas adekuá pa logra resultadonan duradero i inovativo. Meta ta pa kuminsá ku ehekushon di e plan akí despues di zomer.

Riba 16 di aprel komishon di Relashon di Reino lo debatí ku sekretario di estado Szabó i minister Beljaarts tokante desaroyo ekonómiko i kapasidat pa para riba propio pia di e partinan karibense di Reino