Gabinete di Enviado Spesial ta fasilitá programa edukativo pa alumnonan na Boneiru sera konosí ku nabegashon espasial
Fin di febrüari, e gabinete di Enviado Spesial a koordiná un programa edukativo pa laga alumnonan na Boneiru sera konosí di un manera aksesibel ku nabegashon espasial i materianan beta.
Den e siman di 24 te ku 28 di febrüari, alumnonan di grupo 8 di diferente skol básiko i alumnonan di VWO 4 di Liseo por a sigui un programa di lès spesial, orientá riba nabegashon espasial i e materianan beta. E programa tabata un kolaborashon entre e Gabinete di Enviado Spesial, SGB Liseo, Sterk Techniek Onderwijs (STO) i e tim Da Vinci Satelite (DVS-team) di TU Delft (Universidat Tékniko di Delft). Esnan último menshoná a tantu prepará komo presentá e programa.
E programa tabata konsistí di diferente parti; interkambio di konosementu durante lès- i presentashonnan, un bishita na e ‘groundstation’ Galileo i, espesialmente pa dosente, un workshop ‘Train-the-Trainer’, di moda ku nan por traspasá e konosementu atkerí tambe na futuro alumnonan.
E material di lès tabata espesialmente desaroyá pa e programa aki, ku e meta pa hasi e tereno profeshonal aki mas aksesibel pa e hubentut na Boneiru, Saba i Sint Eustatius. Dosentenan di Saba i Sint Eustatius a biaha bin pa nan tambe por partisipá na e workshop ‘Train-the-Trainer’. Ademas, e programa a mustra kon nabegashon espasial ta kontribuí na adelanto teknológiko, sostenibilidat i inovashon den bida diario.
E bishita na e ‘groundstation’ Galileo pa hopi alumno tabata e punto kulminante di e siman. Aki, e alumnonan a haña un rekorido di e tereno i dor di asistí na diferente presentashon, nan a haña komprenshon tokante kon e stashon ta funshoná.