Veenendaal ta aseptá ofishalmente kátedra di Relashonnan den Reino ku diskurso inougural
Prof. dr. Wouter Veenendaal, profesor di Relashonnan den Reino i profesor asosiá den polítika komparativo na Universidat di Leiden, ayera, djaluna, a tene su diskurso inougural. Veenendaal a tene e diskurso inougural akí komo titular di e kátedra (‘leerstoel’) di Representashon Demokrátiko den Reino. Aña pasá ministerio di Asuntunan Interno i Relashonnan den Reino (BZK) a instalá e kátedra akí.
Agènda di investigashon
Durante su diskurso titulá ‘Riba pia ekivalente? Eskala i demokrasia dentro di e relashonnan den Reino’ Veenendaal a profundisá mas den e diferente komponentenan di su agènda di investigashon komo titular di kátedra. Pa e kátedra, Veenendaal a formulá dos (2) meta: garantisá i amplia investigashon tokante Reino i Relashonnan den Reino, i promové kolaborashon riba tereno di investigashon i enseñansa ku universidat- i sientífikonan riba e islanan karibense. Pa logra e último meta akí, Veenendaal ta reklutá tres asistente di investigashon lokal na Aruba, Kòrsou i Sint Maarten.
Den e añanan benidero nan lo bai hasi investigashon huntu kuné komo tim di investigashon di Reino kompleto.
4 liña di investigashon
Durante su diskurso inougural Veenendaal a splika e 4 liñanan di investigashon di su kátedra, ku e ta spera di bai establesé. Nan ta: polítika i demokrasia riba e islanan karibense den Reino mes; representashon demokrátiko di e islanan karibense den Reino; kon ta eksperensia Relashonnan den Reino na Hulanda Oropeo; i investigashon komparativo riba otro áreanan no-soberano.
Enkuesta di opinion
Durante su diskurso Veenendaal a anunsiá ademas e promé resultadonan di un enkuesta di opinion ku el a laga hasi bou di hulandesnan oropeo den preparashon pa su diskurso inougural. A kondusí e investigashon bou di e grupo di eksperto renombrá di LISS di Universidat di Tilburg. Mas òf ménos 2,700 persona a partisipá den e enkuesta akí i a kontestá diferente pregunta di konosementu i opinion tokante Reino. Ta pa promé biaha ku a tene un enkuesta di opinion di e magnitut akí na Hulanda tokante Reino.
Imágen mas positivo
E resultadonan di e enkuesta di opinion akí ta demostrá ku hulandesnan oropeo sa poko tokante Reino i relashonnan den Reino. Solamente un kuart ta bisa ku nan ta na altura di esaki. Tòg nan tin un imágen mas positivo di Relashonnan den Reino ku hopi biaha ta pensa. Asina por ehèmpel un mayoria ta di opinion ku habitantenan di e islanan mester ta liber pa sigui muda pa Hulanda i ku Hulanda tin un obligashon moral pa pèrkurá pa e islanan. E grupo mas grandi ta opiná tambe ku Hulanda mester sostené e islanan finansieramente i ku habitantenan di Hulanda Karibense mester tin e mes benefisionan sosial ku na Hulanda Oropeo.
Hopi seremonia
Formalmente e diskurso inougural a sirbi komo aseptashon di Veenendaal su funshon komo profesor speshal resien nombrá. Un diskurso inougural ta un evento importante ku hopi seremonia. Manera ta kustumber otro profesornan tabata presente, tur bistí den nan toga.
Komishon di guia
E komishon di guia pa e kátedra, yamá tambe kuratorio, ta konsistí di presidente Marja Spierenburg, profesor di antropologia di desaroyo duradero i medionan di eksistensia na Universidat di Leiden, Gert Oostindie, profesor emérito di historia kolonial i pòst kolonial na Universidat di Leiden, Tom Louwerse, profesor asosiá di siensia polítiko i direktor di investigashon di Instituto di Siensia Polítiko di Universidat di Leiden i Saskia de Reuver, Direktor Relashonnan den Reino di Paisnan di e ministerio di BZK.
Desaroyo di konosementu
De Reuver a felisitá Veenendaal na nòmber di direktorado-general di Relashonnan den Reino i ministerio di BZK. ‘E kátedra ku Wouter Veenendaal ta okupá ta hopi importante pa desaroyo di konosementu den i tokante Reino. Ta maravioso pa mira ku Wouter ta atendiendo e enkargo akí ku asina tantu entusiasmo i profeshonalismo.