ZJCN ta lansa Kampaña Kontra Violensia Doméstiko i Maltrato di Mucha: SEIF HUNTU, FUERTE HUNTU
Enfoká riba konseho, komunikashon habrí i prevenshon
Den e último simannan, Kuido i Hubentut Hulanda Karibense (ZJCN) a lansa un kampaña nobo kontra violensia doméstiko i maltrato di mucha, titulá SEIF HUNTU, FUERTE HUNTU.
E kampaña tin komo meta pa sostené profeshonalnan manera trahadó sosial, dosente i trahadó den sektor di kuido médiko den implementashon di e Kódigo di Protekshon nobo, ku ta na vigor for di promé di yanüari 2025.
E kampaña a risibí sosten di Diputadonan sra. Nina den Heyer (Boneiru), sr. Reuben Merkman (Sint Eustatius), sr. Eviton Heyliger (Saba) i tambe di Gezaghèber di Saba, sr. Jonathan Johnson. Nan tur a asistí na vários evento organisá pa profeshonal- i siudadanonan. E eventonan aki a konta ku oradornan ku a kompartí nan eksperiensia personal ku violensia doméstiko, entre otro Jolly van Beelen - Ferwerda, kende ta kabes di skol na Governor de Graaff School na Sint Eustatius. Aktor i kontadó di kuenta, Archell Thompson, un sobrebibiente di maltrato di mucha, tambe a kontribuí na e kampaña. Pa medio di teater interaktivo el a hasi pregunta na un manera aksesibel, pa enkurashá diskushonnan tokante violensia doméstiko i maltrato di mucha.
Nina den Heyer a bisa ku “Den mi tempu no tabatin un sentro kaminda por tuma konseho i mèldu. Sinembargo, komo víktima di violensia doméstiko, mi por a konta ku sosten di famia- i amigunan. Esaki a yuda hopi. P’esei, mi ta hasi un yamada na nos komunidat, pa traha huntu na kreashon di un kultura den kua nos ta sostené otro ora nos ta sospechá violensia doméstiko òf maltrato di mucha."
Jantine Homan, Hefe di e Departamentu Sosial na ZJCN, a agregá: “Lamentablemente violensia doméstiko i maltrato di mucha ta keda un realidat na Hulanda Karibense tambe. E Kódigo di Protekshon i e sentro kaminda por tuma konseho ta pasonan den e bon direkshon pa sostené víktima i komunidat, dunando nan un salida òf simplemente un konseho. ZJCN ta orguyoso di e kampaña aki, enfoká riba e Kódigo di Protekshon, i ta keda komprometé na un Hulanda Karibense mas seif.”
Bo ta preokupá pa bo seguridat personal òf seguridat personal di un otro hende? Bo tin pregunta tokante e Kódigo di Protekshon? Por fabor yama:
Boneiru: Guiami, Sentro Akseso riba 0802-0802
Sint Eustatius: Statia Strong Support Hotline via +5993184837
Saba: Domestic Safety Point via +599 416 6936/ 416 3053
