Suministro di kombustibel garantisá
Pa garantisá suministro di koriente i awa di bebe na Boneiru despues di promé di aprel 2026, mester mehorá e suministro di kombustibel den e lunanan benidero. Entrante promé di aprel 2026 e pèrmit temporal ku eksigensianan di seguridat redusí pa e dos lokalidatnan pa almasenamentu di kombustibel na Boneiru lo vense. E ministerionan enbolbí ta informá Tweede Kamer tokante adaptashon di e situashon i ròl di Reino relashoná ku suministro di kombustibel Boneriano. Kolegio Ehekutivo di Boneiru ta informá Konseho Insular na mes momentu.
No ta alkansá pa kaba konstruí e terminal di kombustibel nobo na e lokalidat sùit di aeropuerto promé ku e pèrmit temporal di e terminal di kombustibel eksistente vense. Loke ku tambe ta hasi falta riba término largu ta e base di sosten pa un almasenamentu di kombustibel na e lokalidat aki. Pa por garantisá almasenamentu di kombustibel seif na Boneiru entrante promé di aprel 2026, lo mester renobá e almasenamentu di kombustibel eksistente pa por kumpli ku e eksigensianan di seguridat original. E partidonan lokal a indiká ku por alkansá esaki promé ku promé di aprel 2026. Pa suministro di kombustibel riba término largu, Entidat Públiko Boneiru (EPB) ta den kontakto ku un kumpradó potensial pa kuminsá di nobo na e almasenamentu di zeta bankrut parti nort di e isla.
Pa motibu ku BBT (‘Bonaire Bon Transition’, 100% propiedat di ministerio di KGG) no ta bai konstruí un terminal di kombustibel riba término kòrtiku i largu na Boneiru, lo traha un plan di desmantelashon pa sera e parti di BBT ku a establesé pa esaki. Ku esei Reino no tin un ròl di maneho mas den suministro di kombustibel i esaki ta bolbe bira un tarea di e isla. Un punto di atenshon aki ta e 5 mion euro ku tin aktualmente den BBT ku e meta pa “almasenamentu di kombustibel” di Boneiru for di e ènvelòp regional. Ta sondea di ki manera por usa e rekursonan aki pa suministro di kombustibel di Boneiru. Tambe ta investigá di ki manera i kon e parti di BBT ku ta hunga un ròl den sostenibilidat di Boneiru por sigui eksistí.