CBS ta para dilanti di klas pa duna un splikashon di e balor di dato na muchanan
Resientemente Ofisina Sentral pa Estadístika (CBS) a start un kampaña públiko pa duna e públiko na Boneiru, Saba i Sint Eustatius un splikashon tokante balor di dato. Finalmente CBS ta e kolekshonadó di dato i e kompiladó di estadístika pa Hulanda Karibense. Den un lès na e skolnan básiko na Boneiru, ta duna splikashon na grupo 7 i 8 tokante balor di dato pero tambe si algu ta un echo òf opinion. Tin intenshon pa duna e lèsnan aki tambe na Saba i St Eustatius.
Ta duna e promé lèsnan na Boneiru.
Dikon ta importante pa sa algu di poblashon di e isla? Na Boneiru e poblashon ta kresiendo pa añanan kaba. E último 10 aña e poblashon a krese ku 40%, e último 15 aña ku 60%. Ta splika e muchanan ku a base di e sifranan di poblashon por plania pa determiná si mester di mas skol òf fasilidat aserka. Sifranan real ta nesesario pa instansianan por hasi kalkulashon i aportá na e debate sosial.
Tema fasinante
Esther Meijer-Sedney (di Kantor CBS Hulanda Karibense) i Arjan van der Meer (di kantor CBS Hulanda) ta enkargá ku e lèsnan.
Meijer: “Muchanan ta haña e tema di poblashon fasinante. Ora ku nos konta ku na Boneiru tin 1451 habitante a bini aserka e aña anterior, e sifra ta bira signifikante, si nos splika ku pa kada 100 habitante, seis nobo a bini aserka dor di nasementu òf imigrashon (Ofisialmente Boneiru tin un total di 26584 habitante entrante 1 di yanüari 2025.”
Van der Meer: “Kua fasilidat lo bo ke mira den futuro? Mas fasilidat di wega ta loke ku ta menshoná basta pero tambe un palu di kos dushi den kurá, kaminda ku kosnan dushi ta krese na dje! E echo ku nan ta partisipá bon den lès, ta skucha i duna bon kontesta, ta nifiká ku nan ta haña e tópiko interesante.”
Ofisina sentral di estadístika (CBS), Echo ku ta konta
