Inspekshon di labor: traha ku asbèst ta rekerí koutela
Riba 10 di mei 2025 a suspendé trabou na un sitio ku trabounan di demolishon ta tuma lugá, kaminda ku tin sospecho ku a deshasí di plachi di dak ku tabata kontené asbèst. Direktorado di Supervishon i Mantenshon di Entidat Públiko Boneiru (OLB) tabata enkargá ku e suspenshon i Inspekshon di Labor di e unidat di RCN Asuntu Sosial i Empleo (SZW) lo tuma e kaso i sigui ku investigashon mas aleu.
E situashon ta mustra kon importante ta pa atendé kuidadosamente ku material ku posiblemente ta kontené asbèst. Ta importante pa laga un eksperto tèst plachinan di dak òf otro material ku tin sospecho di ta kontené asbèst, pa determiná si realmente nan ta kontené asbèst. Atendé di manera inkorekto ku asbèst por okashoná konsekuensia serio pa salú di empleado i bisiñanan.
Obligashonnan legal na momentu di atendé ku asbèst
Den e Dekreto di Seguridat Laboral IV Hulanda Karibense ta inkluí regla kla pa traha ku asbèst. Dunadó di trabou mester:
1. Averiguá si tin asbèst promé ku kuminsá ku trabou (artíkulo 2.3)
Promé ku kuminsá ku ehekushon di trabou na un edifisio òf konstrukshon, e dunadó di trabou mester averiguá si tin asbèst presente. Esaki ta pasa kaminda ku ta bai basha lugá abou òf konstruí.
2. Traha un plan di trabou i hasi notifikashon di e trabou na e supervisor (artíkulo 2.4)
Si resultá ku tin asbèst, e dunadó di trabou mester traha un plan di trabou kla. Aki den tin pará kon mester ehekutá e trabou, ki medida mester tuma pa traha seif, i ken ta enbolbí den esaki. Mester entregá e plan mínimo dos siman adelantá na Inspekshon di Labor di e unidat SZW di RCN.
3. Traha un relato despues di trabou (artíkulo 2.5)
Ora ku e trabou ta kla e dunadó di trabou mester traha un relato di kon e trabou a kana. Inspekshon di Labor ta usa esaki pa kontrolá si tur kos a bai segun regla. Mester warda e relato pa mínimo 2 aña.
Huntu nos ta sòru pa un lugá di trabou seif
Tantu dunadó di trabou komo persona privá por aserká Inspekshon di Labor ku pregunta òf si nan ke konseho tokante trabou seif. Esaki ta konta tambe pa situashonnan ku asbèst. Dor di pidi informashon na tempu i sigui e pasonan korekto, por prevení situashon peligroso. Esun ku no tene su mes na e reglanan, no solamente ta riska un but òf suspenshon di e trabou, sino ta pone salú di hende tambe na peliger.
Pa mas informashon tokante reglanan rondó di traha ku asbèst bo por bishitá e wèpsait di RCN òf tuma kontakto ku e departamentu di Inspekshon di Labor di SZW via arbeidsinspectie@rijksdienstcn.com.