Poblashon Hulanda Karibense na 2024 a oumentá ku kasi 1,6 mil

Notisia | 19-05-2025 | 21:47

Dia promé di yanüari 2025, Hulanda Karibense tabatin kasi 32 mil habitante. Esei ta 1 583 (5 porshento) mas ku un aña pasá. E oumento pa un parti grandi ta pa motibu ku e poblashon na Boneiru a krese, prinsipalmente dor di migrashon. Na Sint Eustatius i Saba tambe e kantidat di habitante a oumentá dor di migrashon. Esei CBS ta mèldu a base di sifranan nobo.

Poblashon Boneiru a oumentá ku 1 419 persona

Boneiru tabatin 26 552 habitante dia promé di yanüari 2025, 1 419 (6 porshento) mas ku un aña pasá. E kresementu aki a bin prinsipalmente pa motibu ku tabatin muchu mas tantu hende ku a bin biba na Boneiru ku hende ku a bai (1 220), i un kantidat limitá di oumento natural (82, e kantidat di hende ku a nase ménos e kantidat di hende ku a fayesé). E kantidat di hende na Boneiru ku a nase pafó di Hulanda Karibense a oumentá ku 1 345 persona. Esei a bini pa gran parti dor ku tabatin mas hende bibá aki ku a nase na Hulanda Oropeo, Kolombia, Kòrsou, i Repúblika Dominikano.

Kantidat di habitante Sint Eustatius a krese ku 66 persona

Dia promé di yanüari 2025, Sint Eustatius tabatin 3 270 habitante, 66 (2 porshento) mas ku na kumienso di 2024. E kresementu a bin prinsipalmente dor ku tabatin mas hende ku a bai biba na e isla ku hende ku abandoná esaki. E kresementy natural tabata limitá. E kantidat di hende na Sint Eustatius ku a nase pafó di Hulanda Karibense a krese ku 64. Partikularmente e kantidat di habitante ku a nase na Sint Maarten a krese. E kantidat di habitante ku a nase na Kòrsou i na Merka hustamente a baha.

Poblashon Saba a oumentá ku 98 persona

Dia promé di yanüari 2025, Saba tabatin 2 158 habitante, 98 (5 porshento) mas ku un aña pasá. Tabatin mas hende ku a bin biba ei ku hende ku a bai (108) i e kresementu natural tabata limitá. E kantidat di hende na Saba ku a nase pafó di Hulanda Karibense a oumentá ku 94. Partikularmente e kantidat di hende ku a nase na Hulanda Oropeo, na Sint Maarten i na Sürnam a oumentá. E kantidat di hende ku a nase na Kòrsou a baha un tiki.