Dies ‘bevelvoerder’ nobo pa Kuerpo di Bombero na Boneiru, Sint Eustatius i Saba
Kuerpo di Bombero Hulanda Karibense (BKCN) a forma dies (10) ‘bevelvoerder’ nobo pa Boneiru, Sint Eustatius i Saba. Nan a risibí entrenamentu pa guia e tim den situashonnan difísil. Por ehèmpel, ora tin kandela, aksidente òf otro situashon di emergensia.
E ‘bevelvoerdernan’ a pasa den un formashon intensivo kaminda a prepará nan mes pa dirigí durante diferente insidente. Nan a trein den kombatimentu di kandela, duna asistensia na momentu di aksidente i kon pa manehá produktonan peligroso na un manera seif. Despues nan a sigui un entrenamentu èkstra pa kombatimentu di kandela di avion, ku a terminá den aprel ku dos dia di práktika.
E departamento ‘Opleiding & Oefenen’ di BKCN a organisá henter e trayekto pa tur partisipante na Boneiru, kaminda instruktornan eksperensiá di BKCN ku sosten di un dosente di ‘Koninklijke Luchtmacht’ a duna e lèsnan. Un komishon di profeshonal den kuerpo di bombero di Boneiru, Sint Eustatius i Kòrsou a hasi e eksámennan.
Pa Saba esaki ta un momento partikular. Dos ‘bevelvoerder’ ku a gradua di e isla no solamente ta hende muhé, sino tambe e promé hende muhénan ‘bevelvoerder’ di Saba. Tambe dos partisipante di Sint Eustatius a logra nan diploma. E otro seis graduadonan ta di Boneiru.
E ’bevelvoerdernan’ nobo lo sigui trein aktivamente, di manera ku nan por aktua lihé i efektivo na momentu di situashon di emergensia. BKCN lo sigui invertí den desaroyo di profeshonalnan den kuerpo di bombero i asina kontribuí na seguridat na Boneiru, Sint Eustatius i Saba.