Kalidat di akohida di mucha na Boneiru, Sint Eustatius i Saba den desaroyo
E kalidat di akohida di mucha na Hulanda Karibense a mehorá riba diferente tereno desde 2023. Na mayoria di e lokalidatnan paso pa paso e kalidat ta bai dilanti. Esaki ta e konklushon di Inspekshon di Enseñansa despues di e di tres rònt di inspekshon na 2024. Basá riba e rapòrt anual di inspekshon, organisashonnan di akohida di mucha ta traha huntu ku e programa BES(t) 4 kids pa sigui mehorá e kalidat. Pa asina kada mucha ta kuidá den un ambiente seif i saludabel, kaminda ku rekreando ta stimulá nan desaroyo.
Na 2024, Inspekshon di Enseñansa (despues: inspekshon) a bishitá 80 lokalidat pa akohida di mucha, akohida despues di skol i ‘gastouderopvang’. Esaki el a hasi den kolaborashon ku inspektor lokal riba e tres islanan. Nan ta investigá si e lokalidatnan aki ta kumpli ku e eksigensianan riba tereno di atministrashon, personal i akomodashon, si nan ta seif i saludabel pa mucha i si ta stimulá e muchanan sufisiente den nan desaroyo. Tambe e inspekshon ta wak si e doño di e akohida di mucha ta dirigí riba mehorashon di kalidat.
E resultadonan
Aña pasá tambe kalidat di e akohida di mucha na e lokalidatnan a mehorá riba diferente tereno. Kada bes mas profeshonal tin e nivel di estudio rekerí i ta sigui un treinen di EHBO pa mucha tur aña. Banda di esei, e kalidat di e programa di aktividat i e materialnan pa hunga kuné, e bista riba desaroyo di e muchanan, e aktuashon pedagógiko-edukativo i e kolaborashon na diferente lokalidat a mehorá. Mas o ménos un kuart di tur e lokalidatnan ta kumpli ku (kasi) tur e eksigensianan riba tereno di atministrashon, personal, akomodashon, seguridat i salubridat.
Na hopi lokalidat mester sigui mehorá kalidat. Por ehèmpel, mas ku un kuart di e lokalidatnan ta sin un adulto presente ku ta kualifiká pa duna EHBO na mucha. Tambe espasionan paden i pafó di e lokalidatnan di akohida di mucha no ta semper seif, aksesibel i ekipá adekuadamente. Na kasi un di sinku parti di e lokalidatnan ainda no ta stimulá e mucha sufisiente òf no ta trata nan na un manera positivo.
E kontinuashon
Tur aña inspekshon ta bishitá tur lokalidat di akohida di mucha pa tene supervishon riba e kalidat. Despues di e rònt anual di inspekshon, tur lokalidat di akohida di mucha ta risibí un rapòrt di konseho ku e puntonan ku ta bai bon i esnan ku mester mehorá. Nan por risibí sosten di por ehèmpel coach pedagógiko òf ‘twinningpartners’ di e programa BES(t) 4 kids.
Ta spera ku dia 1 di yanüari 2026 e Lei di Akohida di Mucha BES lo drenta na vigor. E ora ei tur lokalidat mester kumpli ku tur e eksigensianan di kalidat. Na momentu ku un lokalidat no ta kumpli ku e eksigensianan di seguridat i salubridat, e doño di e akohida di mucha lo risibí un òrdu di restablesimentu ku un término kòrtiku pa drecha e situashon. Kaminda ta nesesario, e inspekshon lo konsehá pa mantené e regla, por ehèmpel dor di imponé un but. Den kaso agudo i serio por sera e akohida (temporalmente).
E rapòrt di inspekshon kompleto ta disponibel riba e wèpsait di Inspekshon di Enseñansa. E reakshon di Sekretario di Estado di SZW, Jurgen Nobel, bo por lesa aki.