Minister Gouke Moes di Enseñansa, Kultura i Siensia (OCW) ta bishitá Boneiru di 4 te ku 6 di novèmber. E bishita aki ta den kuadro di e ‘Ministeriele vierlanden overleg OCW (M4LO)’ i ta ofresé espasio pa e será konosí ku e parti karibense di Reino.
Djamars anochi, 4 di novèmber, gezaghèber di Boneiru, John Soliano huntu ku representante di Reino interino, Jan Helmond lo risibí minister Moes. E siguiente dia ta den kuadro di será konosí ku kolegio ehekutivo di Entidat Públiko Boneiru i bishita na e skol básiko Kolegio Kristu Bon Wardador i na ‘Scholengemeenschap Bonaire’ kaminda e minister ta bai hiba kombersashon ku dosente, lider di skol i alumno. Tambe e ta bai haña un rekorido den parke Mangazina di Rei.
E ‘Ministeriele vierlanden overleg’ OCW (M4LO)’ ta bai tuma lugá riba e di tres dia di e bishita. E ministernan di Enseñansa, Kultura i Siensia di Aruba, Kòrsou, Sint Maarten i Hulanda anualmente ta topa otro durante e M4LO. Durante e enkuentro, Hulanda ta representá Boneiru, Sint Eustatius i Saba tambe.
Partisipantenan na e M4LO ta minister Gerlien Croes (Relashonnan den Reino, Enseñansa, Inovashon i Deporte) di Aruba, minister Sithree van Heydoorn (Enseñansa, Siensia, Kultura i Deporte) di Kòrsou i minister Melissa Gumbs, (Enseñansa, Kultura, Hubentut i Deporte) di Sint Maarten.
Tópikonan di e M4LO ta entre otro e programa ‘Strategic Education Alliance (SEA). Esaki ta un programa importante di ministerionan di enseñansa di Aruba, Kòrsou, Sint Maarten i Hulanda pa Reino henter, pa oumentá e éksito di estudio di studiantenan karibense. Tambe e ta bai toka e tema di akuerdo di kolaborashon Kibrahacha.
E programa aki ta dirigí riba kapasitashon konhunto di dosentenan di enseñansa primario na Aruba, Boneiru i Kòrsou. Un otro tópiko ta e prosedura di nominashon pa e ‘UNESCO-lijst Inmaterieel Erfgoed’ na nòmber di Reino kompletu.
Finalmente e minister ta bai bishita e biblioteka nobo di Boneiru: Biblioteka Públiko di Boneiru.