Di mas guia ora di skohe estudio, te ku interkambio di stazje i di estudio. E programa ‘Education Alliance’ (SEA) ta un inisiativa importante entre gobièrnu- i instansianan di enseñansa di Aruba, Kòrsou, Sint Maarten i Hulanda. Su meta ta pa hasi transishon pa edukashon superior mas fásil i prepará studiantenan mihó pa un estudio na Hulanda òf otro parti. Awe a prolongá e programa akí pa oumentá éksito den estudio pa studiantenan karibense te ku 31 di desèmber 2028.
Esei ta un di e palabrashonnan ku a hasi durante e Konsulta di Ministernan di OCW di e kuater Paisnan (M4LO) na Boneiru. Anualmente e ministernan di enseñansa, kultura i siensia di Aruba, Kòrsou, Sint Maarten i Hulanda ta reuní durante e M4LO. Hulanda ta representá Boneiru, Sint Eustatius i Saba tambe durante e konsulta akí.
Minister Moes:
”Nos kier hasi máksimo uzo di tur talento den nos Reino. Huntu ku mi koleganan di e otro tres paisnan di Reino, nos a traha duru e último añanan riba mas kolaborashon entre e region karibense i Hulanda riba tereno di enseñansa, kultura i siensia. I ku éksito. Por ehèmpel a krea un ret fuerte di dosente, guia i personal di apoyo na Hulanda i riba e islanan, ku ta sostené hóbennan di e parti karibense di Reino ora di hasi eskoho di estudio adekuá i desaroyá nan talentonan.”
E programa SEA ta ofresé entre otro mas beka di Reino pa studiantenan riba nivel MBO, HBO i Akadémiko pa interkambio di estudio òf stazje na otro partinan di Reino Hulandes. Ademas nan ta risibí mihó guia. Na Hulanda por ehèmpel instansianan di enseñansa profeshonal superior (akademia) i di enseñansa profeshonal sekundario (MBO) ta kolaborando den e programa di SEA, pa hasi ku studiantenan karibense por drenta i avansá mas mihó. Mas i mas instansia di enseñansa superior i di enseñansa profeshonal sekundario entretantu tin dianan di introdukshon speshal òf programanan di mentor pa hóbennan prosedente di e área karibense. Kada aña mas di 1600 hóben prosedente di e parti karibense di Reino ta inisiá un estudio na Hulanda.
Ademas e ministernan a disidí pa kolaborá ku instansianan di enseñansa pa promové ‘braingain’ (retené i trese talento bèk). E propósito ta pa interesá hóbennan pa traha na e parti karibense di Reino, pa asina kombatí falta di personal.
Un otro paso pa fortifiká enseñansa den e parti karibense di Reino ta ekspanshon di e aliansa eksitoso "Kibrahacha". Te ainda e programa akí ta konsentrá riba formashon di maestro pa enseñansa primario na Aruba, Boneiru i Kòrsou. Denter di poko ta bin aserka formashon di dosente di enseñansa sekundario i enseñansa profeshonal sekundario.
Ademas Sint Maarten i Hulanda ta studiando si por inisiá un inisiativa similar na isla riba. Kibrahacha ta kombiná formashon di maestro tradishonal ku eksperensianan di práktika den klas. Maestronan di skol ta hunga un papel importante ora di guia futuro maestronan na boka di trabou.
Finalmente durante e M4LO a stipulá un prosedura pa presentá nominadonan pa e lista di Patrimonio Kultural Inmaterial di Unesco na nòmber di Reino kompleto. E profeshon di muladó, e kultura di desfile floral (Corso) i zomercarnaval na Rotterdam ya ta riba e lista aki na nòmber di Hulanda.