Siman pasá a tuma lugá un webinar inspirante i interaktivo tokante eTwinning, organisá den kolaborashon ku Gabinete di Representante Spesial pa Boneiru, Sint Eustatius i Saba. Mas ku trinta dosente i profeshonal di tantu enseñansa primario komo enseñansa sekundario na e tres islanan, a partisipá aktivamente na e seshon.
Durante e webinar e partisipantenan a sera konosí ampliamente ku eTwinning :e plataforma ònlain oropeo ku ta konektá dosente i skolnan ku otro pa traha huntu riba proyektonan edukativo internashonal. E fasilitadónan a duna un splikashon kla tokante e posibilidatnan ku eTwinning ta ofresé pa stimulá siñamentu ku ta pasa frontera i pa fortalesé e abilidatnan digital di alumnonan.
Un di e oradornan tabata Roberto Willems, embahador di eTwinning, ku a kompartí ehèmpelnan inspirante di best practice. A base di proyektonan konkreto el a demostrá kon skolnan por start ku eTwinning di un manera fásil, i kon kolaborashon ku partnernan oropeo por kontribuí na un eksperensia edukativo mas riku pa alumno.
E partisipantenan a reakshoná entusiasmá riba e struktura interaktivo di e webinar i a ekspresá nan apresio pa e guianan práktiko ku nan a risibí pa apliká eTwinning den nan propio lès di práktika.
Na final di e seshon, Representante Spesial Edison Rijna a hasi uso di e oportunidat pa anunsiá un siguiente paso. Lo tin un siguiente webinar 27 di novèmber benidero, e biaha aki dirigí riba Erasmus+. Durante e seshonnan aki, fasilitadónan di e Agensia Nashonal Hulandes Erasmus+ (Nederlands Nationaal Agentschap Erasmus+) lo organisá un presentashon inspirante tokante e posibilidatnan denter di e programa oropeo aki, inkluso proyektonan di mobilidat i otro formanan di kolaborashon internashonal den enseñansa.
Ku e serie di inisiativa aki ta pone un paso importante den fortalesimentu di e orientashon internashonal di enseñansa na Boneiru, Sint Eustatius i Saba. Gabinete di e Representante Spesial lo sigui hasi esfuerso pa promové oportunidatnan pa kolaborashon i pa sigui stimulá interkambio duradero di konosementu entre tantu skolnan den e parti karibense di Reino komo esnan pafó.