Traha un programa di kolaborashon di mas aña pa mehorá e ambiente di biba físiko na Boneiru, Sint Eustatius i Saba i sòru pa pone sufisiente rekurso optenibel pa konstrukshon, mantenshon i remplaso di e infrastruktura lokal. Ku e enkargo aki e siguiente gabinete mester pone man na obra pa mehorá e infrastruktura físiko na e tres islanan karibense. Esaki ta e esensia di e reakshon di gabinete riba e tres konsehonan di Konseho pa Ambiente di Biba i Infrastruktura (Rli, Raad voor de leefomgeving en infrastructuur), Konseho pa Atministrashon Públiko (ROB, Raad voor het Openbaar Bestuur) i e ofisina di konseho Andersson Elffers Felix (AEF). Awe a stipulá e reakshon di gabinete den Konseho di Minister.
Sekretario di Estado Eddie van Marum ta enfatisá e nesesidat di un aserkamentu multianual:
"Gabinete ta sigui traha di forma desidido riba promoshon di kalidat di e ambiente di biba físiko di Boneiru, Sint Eustatius i Saba. Asina, nos a pone sèn èkstra disponibel pa mehorashon di kaya na Boneiru, kreashon di un haf na Saba, i nos ta ofresé sosten pa yuda ku ehekushon. Sin embargo, eliminashon di retraso ta pidi pasenshi. Ta keda na e gabinete nobo ku mester forma pa sigui konstruí riba loke a kuminsá kuné den e aña ku ta tras di lomba i pa tuma medidanan nobo. Gabinete por yuda e Entidatnan Públiko ku sèn i konosementu, pero e islanan mes tambe mester pone man na obra.”
E reakshon di gabinete ta indiká kua pasonan e gabinete demishonario por kuminsá tuma adelantá pa sigui e konsehonan, i kiko e gabinete nobo lo mester kuminsá kuné. Tin menshon di kuater liña di akshon: un programa di kolaborashon di mas aña, fortifiká kapasidat di ehekushon, un mihó garantia di ‘comply or explain’ i finansiamentu duradero.
Asina, tin un nesesidat pa redakshon di un programa di kolaborashon di masaña, den kolaborashon ku e Entidatnan Públiko. Den e asina yamá ‘agèndanan físiko’ aki, ku lo entregá mas lat, ta indiká kiko mester tuma lugá pa konstrukshon di bibienda, kayanan mihó, i aksesibilidat. Den dje tambe lo mester indiká kiko ta e koherensia entre e proyektonan i kon por ehekutá e proyektonan aki paso pa paso. Ta importante tambe pa hasi sèn disponibel di forma duradero pa por ehekutá e enkargonan. E informe di AEF i e konseho di ROB ta demostrá ku e finansiamentu pa hasi invershon, ehekushon di mantenshon i pa garantisá remplaso na tempu di e infrastruktura físiko ainda ta kai chikí. Tur dos informe ta enfatisá ku finansiamentu struktural ta nesesario. Ta keda na un gabinete nobo pa investigá kon lo mester regla esaki.
Tambe ta importante ku tin sufisiente hende pa hasi e trabou. P’esei lo amplia e Ofisina di Proyekto Hulanda Karibense (Projectenbureau Caribisch Nederland) ku personal ku tin eksperensia ku proyektonan den e ambiente di biba físiko. Pa kumpli mihó ku e prinsipio di ‘comply or explain’, lo wak kua legislashon eksistente lo mester introdusí òf revisá mas aleu pa Boneiru, Sint Eustatius i Saba.