Barbara Wolfensberger, direktor-general di Relashonnan den Reino na BZK

E direktorado general di Relashonnan den Reino (DG KR) ta responsabel pa kolaborashon entre Hulanda i e paisnan Aruba, Kòrsou, Sint Maarten i e islanan Boneiru, Sint Eustatius i Saba. Aki ta trata di konseho di maneho i sinkronisashon interdepartamental i e planifikashon, elaborashon i ehekushon di programa- i proyektonan di stimulashon riba e tereno aki.

E tarea pa e direktor-general di Relashonnan den Reino pa ku esaki ta pa denter di e kolaborashon aki, pa e añanan benidero, trese fasilidatnan manera bibienda, ret di kayanan i desaroyo di bario riba e islanan na nivel i pa engrandesé e resistensia i independensia ekonómiko di e islanan. Esaki ta eksigí forsa impaktante, diplomasia, un aserkamentu integral i un aserkamentu habri i ekivalente. Pa ku esaki konosementu profundo i konosementu di e konteksto, desaroyo i sensibilidatnan di e diferente partinan di Reino (geográfiko, históriko, atministrativo) ta sigur esensial. Ta ferwagt di e DG KR tambe pa e guia e reorganisashon di DG KR den e direkshon korekto, ku atenshon pa e karga di trabou i e input di diferente perspektiva.

Vincent Roozen, sekretario-general di BZK:

‘Mi ta entusiasmá ku yegada di Barbara. E ta un direktor-general ku a kustumbrá di kolaborá tantu den e kampo di forsa kompleho di Den Haag komo riba e islanan. Ademas e tin hopi eksperensia ku traha pa i sostené ministernan. Su vishon riba kolaborashon ekivalente i su abilidat pa duna guia tantu di manera stratégiko komo empátiko ta hasié partikularmente adekuá pa e funshon aki. Dor di su enfoke riba konektá, skucha i komprondé, e ta e persona ideal pa krea brùgnan entre Den Haag i e islanan karibense den Reino.’

Barbara Wolfensberger:

‘Mi ta realmente ansioso pa hinka mi kurason i alma den esaki pa huntu ku mi koleganan den e parti karibense di Reino i Den Haag hasi un impakto positivo riba e islanan karibense den Reino. Tin hopi tópiko ku ta konektá nos; pa ku esaki gustosamente mi ta buska profundidat i konekshon. Tambe den e ministerionan na Den Haag nos por pone mas enfoke pa empeñá nos mes di manera dirigí, kla i ku ekspertisio pa un mihó kolaborashon i adelanto den i ku tur ku ta forma parti di Reino. Esta un reto bunita!'

For di 2017 Barbara Wolfensberger ta direktor-general di Kultura i Media na e ministerio di Enseñansa, Kultura i Siensia. Banda di esaki, denter di e direktiva di OCW, e tin enkargo di e kartera pa e partinan karibense di Reino, pa loke ta trata tur tópiko di OCW. Promé ku esaki e tabata Chief Marketing Officer pa Telegraaf Mediagroep, i di 2014 pa 2027, presidente di e Sektor Tòp Industria Kreativo na ministerio di Asuntunan Ekonómiko. Promé e tabata tambe Chief Executive Officer na FHV BBDO i Head of Corporate Identity & Communications na HEMA. Barbara a studia komunikashon na Hogeschool van Utrecht.

E nombramentu aki a bini via e prosedura pa e grupo di maneho haltu di e Servisio Atministrativo General, e asina yamá ‘procedure voor de topmanagementgroep van de Algemene Bestuursdienst’. E Direktorado-General di Servisio Atministrativo General a realisá e reklutashon pa e nombramentu i a sostené e ministerio di Asuntunan Interior i Relashonnan den Reino ku e selekshon. Manera ta kustumber a publiká e vakatura ampliamente pa asina tur hende por a apliká.