Segun e último sifranan, poblashon di e parti Karibense di Reino hulandes ta 8 porshento mas haltu ku na 2011. Partikularmente, e poblashon di Boneiru a oumentá. Komposishon di poblashon riba e islanan tambe a kambia, i e poblashon ta envehesiendo. Desempleo ta mas abou riba tur isla. Esaki CBS ta indiká for di e último sifranan.
Na 2025, e parti Karibense di Reino tin mas ku 330 mil habitante. Kòrsou ta e isla di mas grandi ku 156 mil habitante, siguí pa Aruba (108 mil habitante). Segun e último sifranan, Sint Maarten tabatin 43 mil habitante na 2023.
Den Hulanda Karibense, Boneiru ta e isla di mas grandi na 2025 (kasi 27 mil habitante), miéntras ku Sint Eustatius i Saba tin riba 3 mil i 2 mil habitante, respektivamente. Partikularmente, Boneiru a konosé un kresementu enorme di kasi 70 porshento. Esaki ta debí prinsipalmente na migrashon.
Islanan ta envehesé rápidamente
Riba tur isla, envehesimentu di poblashon a oumentá, spesialmente na Kòrsou. Einan, 1 kuart di e poblashon tin 65 aña òf mas. Esaki tabata kasi 14 porshento na 2011. Na Hulanda Karibense, e proporshon di grandinan ta muchu mas abou. Einan, alrededor di 15 porshento di e poblashon tin 65 aña òf mas. Na 2011, esaki tabata mas o ménos 10 porshento.
Komposishon di poblashon a kambia
Na Boneiru, e proporshon di habitante nasé riba e isla aki a baha di 42 porshento na 2011, pa 30 porshento na 2025. E proporshon di habitante nasé na Hulanda Oropeo a oumentá di 11 porshento pa 17 porshento, i e proporshon di habitante nasé na Sur i Sentro Amérika a oumentá di 19 porshento pa 25 porshento.
Na Saba, e proporshon di habitante ku a nase einan a baha di 31 porshento pa 22 porshento, miéntras ku e kantidat di habitante di Sur i Sentro Amérika ta oumentá. Sint Eustatius ta mustra un oumento leve di mas ku 3 porshento di e habitantenan ku a nase einan.
Na Kòrsou i Aruba, e parti di e poblashon ku a nase riba e isla mes, a keda práktikamente meskos, miéntras ku na Sint Maarten, e parti di e residentenan ku a nase riba e isla mes a baha un poko.
Papiamentu i ingles ta e idiomanan mas papiá
Na Kòrsou, kasi 80 porshento di e poblashon ta papia Papiamentu. Na Boneiru, esaki ta 62 porshento. Na Boneiru tambe ta papia spañó i ingles (tur dos 15 porshento). Na Aruba, Papiamento ta e idioma mas papiá. Papiamento i Papiamentu ta dos variante ofisial di e mesun idioma. Aruba ta usa Papiamento, Boneiru i Kòrsou ta usa Papiamentu. E diferensianan prinsipal ta den ortografia i tin biaha den pronunsiashon.
Na Sint Maarten, Saba, i Sint Eustatius, ingles ta e idioma mas papiá. 83 porshento di e habitantenan di Saba ta papia prinsipalmente ingles. Na Sint Eustatius, esaki ta 81 porshento, i na Sint Maarten, 71 porshento.
Desempleo mas abou riba mayoria isla
Na Kòrsou , desempleo a baha di 13 porshento na 201,4 te 8 porshento na 2024. Na Aruba, desempleo a baha entre 2016 i 2024 (di 8 porshento pa 4 porshento). Na 2024, desempleo na Boneiru tabata 2 porshento, kompará ku 6 porshento na 2012.
Na Sint Eustatius, desempleo a subi di 3 porshento na 2012 pa 4 porshento na 2024. Saba tin e tasa di desempleo mas abou, na 1 porshento.
Preis a oumentá mas na Kòrsou
Na 2024, preis na Kòrsou tabata 37 porshento mas haltu ku na 2011. Na Aruba, preis a oumentá ménos, na 13 porshento. Inflashon ta fluktua alrededor di 2 porshento anualmente na mayoria isla, kaminda 2022 ta un eksepshon kla.
Na tur isla den e parti Karibense di Reino hulandes, inflashon tabata muchu mas haltu na 2022: di kasi 4 porshento na Sint Maarten pa 10 porshento na Boneiru.